தருமபுரி, மே 16-அரூர் அருகே புது கொக்கராப்பட்டியில் குடிநீர் தட்டுப்பாடு ஏற்பட்டுள்ளதால் அப்பகுதி மக்கள் சிரமத்திற்குள்ளாகி வருகின்றனர். தருமபுரி மாவட்டம், அரூர் ஒன்றியம் புது கொக்கராப்பட்டியில் 300க்கும் மேற்பட்டகுடும்பத்தினர் வசித்து வருகின்றனர். இப்பகுதி மக்களின் குடிநீர் தேவைக்காக, ஒகேனக்கல் கூட்டு குடிநீர் திட்டத்தின் கீழ்தண்ணீர் விநியோகம் செய்யப்பட்டு வருகிறது. இந்நிலையில் கடந்த சில மாதங்களாக, 10 நாட்களுக்கு ஒரு முறை மட்டுமேதண்ணீர் விநியோகம் செய்யப்படுகிறது. அதுவும் குறைந்த நேரமே விநியோகம்செய்வதால், அப்பகுதி மக்களுக்கு போதுமானதாக குடிநீர் கிடைக்கவில்லை. எனவே குடிநீருக்காக, அருகில் உள்ள கிராம பகுதிகளுக்கு செல்ல வேண்டிய நிலை ஏற்பட்டுள்ளது. இதனால் மக்கள் கடும்சிரமத்திற்குள்ளாகி வருகின்றனர். இது குறித்து அதிகாரிகளிடம் பலமுறை புகார் கூறியும் நடவடிக்கை எடுக்காமல் மெத்தன போக்கு உடன் செயல்பட்டு வருகின்றனர். இப்பகுதி மக்களின் நலனைக் கருத்தில் கொண்டு, ஒகேனக்கல் குடிநீர் 2 நாட்களுக்கு ஒரு முறை விநியோகம் செய்ய நடவடிக்கை எடுக்க வேண்டும் என அப்பகுதி மக்கள் வேண்டுகோள் விடுத்துள்ளனர்.
ஊடக உலகில் உண்மையின் பேரொளி