புதுதில்லி, மே 9 - ஒன்றிய கல்வி அமைச்சகத்தின் கீழ் செயல்படும் அறிவியல் மற்றும் தொழில்நுட்ப கலைச்சொற்களின் ஆணையம் 10 இந்திய மொழிகளின் தொழில்நுட்ப மற்றும் அறிவியல் சொற்களை உருவாக்கி, கற்றல் துறையில் பயன்படுத்தவுள்ளது. இந்த ஆணையம் மூன்று அல்லது நான்கு மாதங்களில், ஒரு மொழிக்கு 5000 சொற்களைக் கொண்ட அடிப்படை அகராதிகளை வெளியிடவுள்ளது. டிஜிட்டல்மயமாக்கப்படும் இவை, எளிதில் தேடக்கூடியதாகவும் இலவசமாகவும் இருக்கும். ஒவ்வொரு மொழியிலும், கிட்டத்தட்ட ஆயிரம் முதல் இரண்டாயிரம் பிரதிகள் வரை அச்சடிக்கப்பட உள்ளன. இந்திய அரசியல் சாசனத்தின் 8 ஆவது அட்டவணைப்படி, அதிகாரப்பூர்வமான 22 மொழிகளில், போடோ, சந்தாலி, டோக்ரி, காஷ்மிரி, கொங்கணி, நேபாளி, மணிப்பூரி, சிந்தி, மைதிலி மற்றும் சமஸ்கிருதம் ஆகிய மொழிகள் இதில் பட்டியலிடப்பட்டுள்ளன. இம்மொழிகளில் ஆய்வுப் புத்தகங்கள் கிடைப்பதில் பற்றாக்குறை நிலவுகிறது. அறிவியல் நிகழ்வுகள் மற்றும் தொழில்நுட்ப வகைகளை விளக்குவதற்கு போதிய வார்த்தைகள் இல்லை. அந்தந்தப் பகுதி மொழிகளில் (பிராந்திய மொழி) சொற்கள் கிடைக்காத போது, ஆங்கில வார்த்தைகளைப் பயன்படுத்திய தொடக்க நிலையிலான அரிதான உள்ளடக்கமும் இதில் வரையறுக்கப்பட்டுள்ளது. உடனடிப் பணியாக, பத்திரிகை, பொது நிர்வாகம், வேதியியல், தாவரவியல், விலங்கியல், உளவியல், இயற்பியல், பொருளாதாரம், ஆயுர்வேதம், கணிதம், கணினி அறிவியல், அரசியல் அறிவியல், வேளாண்மை, குடிமை மற்றும் மின் பொறியியல் ஆகிய 15 துறைகள் உள்ளடக்கம் செய்யப்பட்டுள்ளன. இது, இடைநிலை முதல் உயர்நிலைப் பள்ளி, பல்கலைக்கழகங்கள் வரை பாடநூல் உருவாக்கத்திற்கு வழிவகுக்கும்.
விரிவான விநியோகம்
இந்த அகராதிகள் மாநில கல்வி ஆணையங்கள், பல்கலைக்கழகங்கள், பொறியியல் நிறுவனங்கள் மற்றும் தேசிய தேர்வு நிறுவனம் நடத்தும் பொது பல்கலைக்கழக நுழைவுத் தேர்வு (கியூட்), இணை நுழைவுத் தேர்வு (ஜேஇஇ), பல்கலைக்கழக மானியக் குழு(யுஜிசி), தேசிய தகுதித் தேர்வு (நெட்) உள்ளிட்ட நுழைவுத் தேர்வுகளுக்கு உள்ளடக்கம் தயாரிப்பதற்கும் வழங்கப்படும். 14 மொழிகளைக் கொண்ட இந்த மொழிப் பட்டியல் 1950 ஆம் ஆண்டு உருவாக்கப்பட்டது. 1967இல் சிந்தி, 1992 இல் கொங்கணி, மணிப்பூரி மற்றும் நேபாளி மொழிகள், 2004 இல் போடோ, டோக்ரி, மைதிலி மற்றும் சந்தாலி மொழிகள் இணைக்கப்பட்டன. இந்த 10 மொழிகளில், உள்ளடக்கம் மற்றும் மொழி வளங்கள் போதியளவு இல்லை. மேலும், இம்மொழிகளில் ஆய்வுப் புத்தகங்கள் பற்றாக்குறை நீடிப்பது முதன்மை பிரச்சனையாக உள்ளது என அறிவியல் மற்றும் தொழில்நுட்ப கலைச்சொற்களின் ஆணையத் தலைவர் கிரிஸ் நாத் ஜா தெரிவித்தார். 1961 ஆம் ஆண்டு அமைக்கப்பட்ட இந்த ஆணையம், அனைத்து இந்திய மொழிகளிலும் தொழில்நுட்ப கலைச்சொற்களை உருவாக்குவதற்கான ஆணையைக் கொண்டுள்ளது. இந்த அமைப்பு, மும்பை ஐஐடி உள்ளிட்ட முக்கிய நிறுவனங்களுடன், விரைவான ஆன்-லைன் பரப்புதலுக்காக பல புரிந்துணர்வு ஒப்பந்தங்களை இறுதி செய்து வருகிறது. தேசிய கல்விக் கொள்கை 2020, பள்ளி மற்றும் கல்லூரிகளிலும் பிராந்திய மொழிகளைக் கல்வி ஊடகமாகப் பயன்படுத்துவதை ஆதரித்துள்ளதால், இந்த நடவடிக்கை முக்கியத்துவம் பெறுகிறது.