உலக தடகள சாம்பியன்ஷிப் போட்டி ஈட்டி எறிதலில் அன்னு ராணி தனது சிறந்த முயற்சியால் 61.12 மீட்டர் துரம் எறிந்து 7ஆவது இடத்தை பிடித்தார்.
18ஆவது உலக தடகள சாம்பியன்ஷிப் போட்டி அமெரிக்காவின் ஓரேகானில் நடைபெற்று வருகிறது. இதில் 22 பேர் கொண்ட இந்திய தடகள அணி, ஒலிம்பிக் சாம்பியன் நீரஜ் சோப்ரா தலைமையில் பங்கேற்றுள்ளது. இதில் மகளிருக்கான ஈட்டி எறிதல் போட்டியில் இந்தியா சார்பில் அன்னு ராணி பங்கேற்றார்.
மகளிர் ஈட்டி எறிதல் இறுதிப்போட்டியில் இந்தியாவின் தேசிய சாதனையாளரான அன்னு ராணி, தனது சிறந்த முயற்சியாக 61.12 மீட்டர் தூரம் ஈட்டி எறிந்தார். இதன்மூலம் அன்னு ராணி ஏழாவது இடத்தை பிடித்தார்.
ஆஸ்திரேலியாவின் கெல்சி-லீ பார்பர் 66.91 மீட்டர் தூரம் ஈட்டி எறிந்து தங்கப் பதக்கத்தை தட்டிச் சென்றார். அமெரிக்காவின் காரா விங்கர் 64.05 மீட்டர் தூரம் எறிந்து வெள்ளிப் பதக்கம் வென்றார். ஜப்பானின் ஹருகா கிடாகுச்சி 63.27 மீட்டர் தூரம் எறிந்து வெண்கலம் வென்றார்.
அன்னு ராணி பதக்கம் வெல்லத் தவறினாலும், உலக சாம்பியன்ஷிப்பில் முதல் எட்டு இடங்களை 2 முறை பெற்ற இரண்டாவது இந்தியப் பெண்மணி ஆனார். உலக தடகள சாம்பியன்ஷிப் தொடரில் இறுதிப் போட்டிக்கு தொடர்ந்து 2 முறை முன்னேறிய முதல் இந்தியர் அன்னு ராணி ஆவார்.