மறவன்வயல் அரசு வீடுகளை முழுமையாக கட்டித் தர கோரிக்கை

சேதுபாவாசத்திரம், ஜூலை 9-  

    தஞ்சாவூர் மாவட்டம் சேதுபாவாசத்திரம் ஒன்றியம், ராவுத்தன் வயல் ஊராட்சி, மறவன்வயல் பகுதியில் அகில இந்திய விவசாயத் தொழிலாளர்கள் சங்கத்தின் புதிய கிளை அமைப்பு கூட்டம் நடைபெற்றது.

    கூட்டத்தில், வி.தொ.ச மாவட்டச் செயலாளர் ஆர்.வாசு சிறப்புரையாற்றினார். இக்கூட்டத்தில் 53 பேர் விவசாயத் தொழிலாளர் சங்கத்தில் தங்களை இணைத்துக் கொண்டனர். இதில் தலைவராக கே.ராஜேந்திரன், செயலாளராக வி.நீலகண்டன், பொருளாளராக கே.பழனிவேல், துணைத் தலைவராக ஆர்.லீலாவதி, துணைச் செயலாளராக டி.சசிகுமார் தேர்வு செய்யப்பட்டனர்.  

    மறவன்வயல் பகுதியில் பொதுமக்களுக்கு குடிமனைப் பட்டா வழங்க வேண்டும். அரசு வீடு கட்டித் தர வேண்டும். மறவன் மேட்டு வயல் பகுதியில் குடிநீர் வசதி, பெண்களுக்கு கழிப்பறை வசதி செய்து தர வேண்டும். பகுதி நேர அங்காடி அமைத்து தர வேண்டும். தூய்மைக் காவலர்கள் மூலம் குப்பைகளை அகற்ற வேண்டும்.  இப்பகுதியில் 30 வீடுகளுக்கு மின் இணைப்பு இல்லாமல் உள்ளது. உடனடியாக மின் இணைப்பு வழங்க வேண்டும்.

    சுடுகாடு ஆக்கிரமிப்புகளை அகற்றி சுடுகாடு கட்டடம் அமைத்து தர வேண்டும். பேருந்து நிறுத்தம் அமைக்க வேண்டும். பிரதம மந்திரி வீடு கட்டும் திட்டத்தின் கீழ் அரைகுறையாக கட்டி நிறுத்தி வைக்கப்பட்டுள்ள வீடுகளை உடனடியாக கட்டி தர வேண்டும். இப்பகுதியில் சாலை அமைக்க வேண்டும் என்பன உள்ளிட்ட தீர்மானங்கள் நிறைவேற்றப்பட்டன.