மார்க்சிஸ்ட் கம்யூனிஸ்ட் கட்சியின் தாராபுரம் அலுவலகத்தில் இன்று சாதி மறுப்பு திருமணம் நடைபெற்றது.
சாதி மறுப்பு திருமணங்களுக்கு மார்க்சிஸ்ட் கம்யூனிஸ்ட் கட்சியின் அலுவலகங்கள் திறந்தே இருக்கும் என்று சிபிஎம் மாநிலச் செயலாளர் பெ.சண்முகம் கூறியிருந்த நிலையில், தமிழகம் முழுவதும் மார்க்சிஸ்ட் கம்யூனிஸ்ட் கட்சியின் அலுவலகத்தில் தொடர்ச்சியாக சாதி மறுப்பு திருமணங்கள் நடத்தி வைக்கப்பட்டு வருகிறது.
இந்நிலையில், திருப்பூர் மாவட்டம், சின்ன மருதூரைச் சேர்ந்த கே.மனோகரன் என்பவருக்கும், மாயனூரைச் சேர்ந்த ஹரிஷ்மா என்பவருக்கும் சாதி மறுப்பு திருமணம் இன்று நடைபெற்றது.
மார்க்சிஸ்ட் கம்யூனிஸ்ட் கட்சியின் தாராபுரம் அலுவலகத்தில் நடைபெற்ற இந்நிகழ்வில், ஓய்வுபெற்ற ஆசிரியர் சீனிவாசன் மாலை எடுத்துக் கொடுக்க, இருவரும் மாலை மாற்றிக் கொண்டு, திருமணம் செய்து கொண்டனர். ஓய்வு பெற்ற வங்கி மேலாளர் வீ.டி.அழகர், ஓய்வுபெற்ற காவல் அதிகாரி வேலுச்சாமி, மார்க்சிஸ்ட் கம்யூனிஸ்ட் கட்சியின் மாவட்டக்குழு உறுப்பினர் என்.கனகராஜ் ஆகியோர் மணமக்களை வாழ்த்திப் பேசினர்.