சென்னை:
தமிழகத்தில் உள்ள 2 கோடியே 9 லட்சத்து 59 ஆயிரத்து 349 ரேசன் அட்டைகளுக்கு கொரோனா முதல் தவணை நிவாரண தொகையாக ரூ.2 ஆயிரம் வழங்கும் பணி கடந்த மே மாதம் 15 ஆம் தேதி தொடங்கியது.மே மாத இறுதி வரையில் சுமார் 4 லட்சம் ரேசன் அட்டைதாரர்கள் கொரோனா நிவாரண தொகை பெறாமல் இருந்தனர்.
இந்த நிலையில், முதல் தவணை நிவாரண தொகையை பெறாதவர்கள் ஜூன் மாதமும் நிவாரண தொகையை பெற்றுக் கொள்ளலாம் என்று முதலமைச்சர் மு.க.ஸ்டாலின் அறிவித்தார். இதையடுத்து விடுபட்டவர்களுக்கு முதல் தவணை நிவாரண தொகை ரேசன் கடைகளில் தொடர்ந்து வழங்கப் பட்டு வருகிறது.அதன் அடிப்படையில் கடந்த 9 ஆம் தேதி வரை 2 கோடியே 7 லட்சத்து 5 ஆயிரத்து 943 ரேசன் அட்டைதாரர்கள் முதல் நிவாரண தொகையை பெற்றுள்ளனர். இது 98.79 சதவீதம் ஆகும்.இன்னும் 2 லட்சத்து 53 ஆயிரத்து 406 ரேசன் அட்டைதாரர்கள் இதுவரை முதல் தவணை நிவாரண தொகையை பெறவில்லை. அதிகபட்சமாக தென் சென்னை மாவட்டத்தில் 40 ஆயிரத்து 583 ரேசன் அட்டை தாரர்களும், குறைந்தபட் சமாக நாகப் பட்டினம் மாவட்டத்தில் 807 ரேசன் அட்டைதாரர்களும் முதல் தவணை நிவாரண தொகையை பெறவில்லை.விடுபட்டவர்களுக்கு ரேசன் கடைகளில் முதல் தவணை நிவாரண தொகை வழங்க தொடர்ந்து நடவடிக்கை எடுக்கப்பட்டு வருகிறது.
தொடங்கியது டோக்கன் விநியோகம்...
கொரோனா நிவாரண நிதியின் இரண்டாம் தவணை ரூ. 2,000 மற்றும் நிவாரணப் பொருள்களுக்கு டோக்கன் வழங்கும் பணிகள் ஜூன் 11 அன்று தொடங்கியுள்ளது. ஜூன் 14 ஆம் தேதி வரை இதற்கான டோக்கன் விநியோகிக்கப் படும். ஜூன் 15 முதல் ரேசன் கடைகளில் காலை 8 மணிமுதல் 12 மணிவரை டோக்கன் அடிப்படையில் மளிகைப் பொருள்கள் மற்றும் இரண்டாம் தவணை ரூ. 2,000 பெற்றுக் கொள்ளலாம் என அறிவிக்கப்பட்டுள்ளது.