சென்னை, ஜூன் 2-தமிழ்நாடு சிறுபான்மை மக்கள் நலக்குழு மாநில தலைவர் எஸ்.நூர்முகம்மது, பொதுச்செயலாளர் ப.மாரிமுத்து வெளியிட்ட அறிக்கை வருமாறு:நாட்டின் 17வது நாடாளுமன்ற தேர்தல் நடைபெற்று முடிந்து மீண்டும் தனிப் பெரும்பான்மையுடன் ஆட்சிப் பொறுப்பேற்று மோடி மீண்டும் பிரதமராகியுள்ளார். வெற்றி பெற்ற தனதுகட்சியினரிடையே பேசும் போது அனைத்து பகுதியினரையும் அரவணைத்துச் செல்வது போன்ற தோற்றத்துடன் அவரது பேச்சு அமைந்தது.ஆனால் யதார்த்தத்தில் மதவெறிகொண்ட பாஜகவைச் சார்ந்தவர்களால் சிறுபான்மை மக்களுக்கு எதிரான தாக்குதல்கள் தொடர்கின்றன என்பதையே சமீப கால நிகழ்வுகள் சுட்டிக் காட்டுகின்றன.மத்தியப் பிரதேசத்தில் சியோனி எனும் இடத்தில் முஸ்லிம் மதத்தை சார்ந்த இரண்டு ஆண்களையும் ஒருபெண்ணையும் மரத்தில் கட்டி வைத்துதாக்கியதோடு அவர்காளை ஜெய் ஸ்ரீராம் என முழக்கமிட நிர்பந்தப்படுத்தியுள்ளனர்.குர்கிராம் எனும் இடத்தில் மசூதியில் தொழுகை முடித்து வந்த முகம்மது பர்காத் ஆலம் எனும் 25 வயது இஸ்லாமிய இளைஞனைத் தாக்கி அவரது தலையில் இருந்த தொப்பியை அகற்றியதோடு ஜெய் ஸ்ரீ ராம் என முழக்கமிட நிர்பந்தப் படுத்தியுள்ளனர். பீகார் மாநிலம் பெகுசராய் எனும்இடத்தில் 28 வயது மிர்காசிம் எனும்இளைஞன் முஸ்லிம் என்று அறிந்தவுடன் துப்பாக்கியால் சுட்டு காயப் படுத்தியுள்ளனர்.புனேயைச் சார்ந்த மகப்பேறு மருத்துவர் அருண்கோரே புதுதில்லியில் நடைபயிற்சியின் போது கன்னாட்பிளேஸ் அருகில் வைத்து தாக்கப் பட்டு ஜெய் ஸ்ரீராம் என முழக்கமிட வைக்கப்பட்டுள்ளார். இத்தகைய செயல்களால் சிறுபான்மை மக்கள் அச்சமடைந்துள்ளனர். சங் பரிவார மதவெறியர்களின் இத்தகைய அராஜக செயல்களைக் கண்டிப்பதோடு குற்றவாளிகள் கைதுசெய்யப்பட்டு தண்டிக்கப்பட வேண்டும் என்றும் மத்திய மாநில அரசுகள்மதவெறியர்களின் தாக்குதல்களை தடுத்து நிறுத்தவும் சிறுபான்மை மக்களுக்கு பாதுகாப்பு வழங்கவும் நடவடிக்கை எடுக்க வேண்டுகிறோம்.இவ்வாறு அவர்கள் கூறியுள்ளனர்.
ஊடக உலகில் உண்மையின் பேரொளி