ஆயுத பூஜை தொடர் விடுமுறையையொட்டி ரயில்களில் முன்பதிவு தொடங்கியுள்ளதாக தெற்கு ரயில்வே தெரிவித்துள்ளது.
இதுதொடர்பாக தெற்கு ரயில்வே வெளியிட்டுள்ள செய்திக்குறிப்பில், இந்தாண்டு ஆயுத பூஜை வரும் அக்டோபர் 11ஆம் தேதியும், விஜயதசமி அக்டோபர் 12ம் தேதியும் கொண்டாடப்பட உள்ளது. தொடர்ந்து, 13ஆம் தேதி ஞாயிற்றுக்கிழமை என்பதால் 3 நாட்கள் தொடர்ச்சியாக விடுமுறை உள்ளது. இந்த தொடர் விடுமுறை முன்னிட்டு பலரும் தங்களது சொந்த ஊர்களுக்கு செல்ல அதிக வாய்ப்புள்ளது. இந்நிலையில் ரயிலில் பயணம் மேற்கொள்வோர் முன்கூட்டியே முன்பதிவு செய்ய ஏதுவாக தெற்கு ரயில்வே அறிவித்துள்ளது.
மேலும், ரயில்வேயில் 120 நாட்களுக்கு முன்பே டிக்கெட் முன்பதிவு செய்துகொள்ளும் வசதி இருப்பதால், அக். 9ஆம் தேதிக்கு புறப்படுவோர் இன்று முன்பதிவு செய்து கொள்ளலாம் எனவும், அக்.10ஆம் தேதி செல்வோர் நாளையும், அக்.11ஆம் தேதி செல்வோர் 13ஆம் தேதியும் முன்பதிவு செய்து கொள்ளலாம் என அச்செய்திக்குறிப்பில் தெரிவிக்கப்பட்டுள்ளது.