வணிகக் குறிப்புகள்

‘வோடபோன் ஐடியா நீடிப்பது கடினம்’

ஜனவரி அல்லது பிப்ரவரி மாதத்திற்குள் அதன் விளம்பரதாரர்களிடமிருந்து புதிய மூலதனத்தை நிறுவனம் பெறாவிட்டால், கடனில் சிக்கியுள்ள வோடபோன் ஐடியா ‘உயிர்வாழ்வது’ மிகவும் கடினமாகிவிடும் என்று அரசு அதிகாரி ஒருவர் கூறியுள்ளார். நிறுவனம் தெளிவான முதலீட்டுத் திட்டத்தைப் பகிர்ந்து கொண்டால் மட்டுமே, ஒத்திவைக்கப்பட்ட ஏஜிஆர் தொடர்பான நிலுவைத் தொகையில் அதன் 16,130 கோடி திரட்டப்பட்ட வட்டியை பங்குத் தொகையாக மாற்ற முடியும் என்று அந்த அதிகாரி மேலும் கூறினார். 

இந்தியாவின் விகிதம் பாகிஸ்தானுக்கு இல்லை

இந்தியாவுக்கு வழங்கிய அதே தள்ளுபடி விலையில் பாகிஸ்தானுக்கு எண்ணெய் வழங்க ரஷ்யா மறுத்ததாக தி எகனாமிக் டைம்ஸ் செய்தி வெளியிட்டுள்ளது. மாஸ்கோவில் இரு தரப்புக்கும் இடையே சமீபத்தில் நடந்த சந்திப்பின் போது பாகிஸ்தானின் கோரிக்கைக்கு இடமளிக்க ரஷ்யா மறுத்ததாக தெரிகிறது. ரஷ்யாவிடம் இருந்து தள்ளுபடி கிடைத்ததாக பாகிஸ்தான் கூறியது; ஆனால் எவ்வளவு தள்ளுபடி என விகிதத்தைக் குறிப்பிடவில்லை.

ஆண்கள் பாத்திரம் கழுவக் கூடாதா?

ஆண்களுக்கான பாத்திரம் கழுவும் திரவத்திற்கான தனது புதிய விளம்பரம் ‘ஒரு நகைச்சுவை’ என்று விம் (Vim)  கூறியுள்ளது. ஆண்கள் பாத்திரங்களைக் கழுவுவதை ஊக்குவிக்கவும் இயல்பாக்கவும் ‘விம் பிளாக்’ எனும் திரவப் பொருளை அறிமுகப்படுத்தியதற்காக நிறுவனம் மற்றும் அதன் பிராண்ட் அம்பாசிடர் மிலிந்த் சோமன் சமூக ஊடகங்களில் கிண்டல் செய்யப்பட்டது. இந்நிலையில் அது லிமிடெட் எடிஷன் பாட்டில் என்றும், உள்ளே இருக்கும் திரவம் ஒன்றுதான் என்றும் விம் நிறுவனம் பின்வாங்கியுள்ளது. ஆண்கள் பாத்திரம் கழுவுவதை இழிவாகப் பார்க்கும் ஆணாதிக்க சிந்தனை, நவீன ஊடகங்களிலும் நிலவுவதை இது காட்டுகிறது.

500 ஜெட் விமானங்களுக்கு ஆர்டர்

ஏர் இந்தியா, டாடா குழும கூட்டு ஸ்தாபனத்தின் கீழ் மறுமலர்ச்சி திட்டத்தின் ஒரு பகுதியாக 500 ஜெட்லைனர்களுக்கான ஆர்டர்களை வழங்க உள்ளது என்று ராய்ட்டர்ஸ் தெரிவித்துள்ளது. ஏர்பஸ் மற்றும் போயிங்கிலிருந்து பல்லாயிரக்கணக்கான பில்லியன் டாலர்கள் மதிப்புள்ள விமானங்கள் வாங்குவதற்கான ஆர்டர்களை ஏர் இந்தியா முன் வைக்கும் என்று எதிர்பார்க்கப்படுகிறது. ஆர்டர்களில் 400 சிறிய ரக ஜெட் விமானங்கள் மற்றும் 100 அல்லது அதற்கு மேற்பட்ட பெரிய ரக ஜெட் விமானங்கள் அடங்கும்.

‘கிரிப்டோ தரவுகள் தவறானது’

ரிசர்வ் வங்கியின் துணை ஆளுநர் டி.ரபி சங்கர், கிரிப்டோகரன்சியில் கிடைக்கும் தரவுகள் அனைத்தும் தவறாக வழிநடத்துவதாகவும், டிஜிட்டல் கரன்சிகள் என்றால் என்ன, அவற்றின் நோக்கம் என்ன என்பதைப் பற்றிய தெளிவான புரிதலுடன் தொடர்புடைய விதிகளை உருவாக்க வேண்டும் என்றும் கூறினார். “போதுமான, நம்பகமான மற்றும் நிலையான தகவல்களை” சேகரிப்பதன் அவசியத்தை அவர் எடுத்துரைத்தார்.  (தி  பிரிண்ட்) கிரிப்டோவை திறம்பட ஒழுங்குபடுத்துவதற்கு ஒரு தகவல் தொடர்பு தேவை என்றார்.

100 ஆப்பிள் ஸ்டோர்களை திறக்க திட்டம்

டாடா குழுமம் நாடு முழுவதும் சுமார் 100 பிரத்யேக ஆப்பிள் ஸ்டோர்களை தொடங்க திட்டமிட்டுள்ளதாக கூறப்படுகிறது. எகனாமிக் டைம்ஸ் தகவல் படி, இதற்காக, ஆப்பிள் நிறுவனம் டாடாவுக்குச் சொந்தமான இன்பினிட்டி ரீடெய்ல் நிறுவனத்துடன் இணைந்துள்ளது. இது குரோமா ஸ்டோர் எனும் சங்கிலித் தொடர் கடைகளை நடத்துகிறது. இந்த கடைகள் ஒவ்வொன்றும் 500-600 சதுர அடியில் இருக்கும்.

400 மில்லியன் டாலர் பெறும் லென்ஸ்கார்ட்

4.5 பில்லியன் டாலர் மதிப்பீட்டில் 350 மில்லியன் டாலர் முதல் 400 மில்லியன் டாலர் வரை முதலீடு செய்ய லென்ஸ்கார்ட் கண்ணாடி விற்பனை நிறுவனத்துடன் அபுதாபி முதலீட்டு ஆணையம் (ADIA) மேம்பட்ட பேச்சுவார்த்தையில் ஈடுபட்டுள்ளதாக எகனாமிக் டைம்ஸ் தெரிவித்துள்ளது. இன்னும் ஓரிரு வாரங்களில் அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. இந்த முதலீடு மூலம் லென்ஸ்கார்ட்டில் கிட்டத்தட்ட 10 சதவீதம் பங்குகளை அபுதாபி முதலீட்டு ஆணையம் பெறுகிறது.

பெண்களே அதிகம் நடந்து செல்கிறார்கள்

உலக வங்கியின் அறிக்கையின்படி, இந்திய நகரங்களில் பொதுப் போக்குவரத்தை அதிகம் பயன்படுத்துபவர்களில் ஆண்களுடன் ஒப்பிடும்போது அதிகமான பெண்கள் வேலைக்கு நடந்து செல்கின்றனர். ஏறக்குறைய 45.4 சதவீதம் பெண்களும் 27.4 சதவீதம் ஆண்களும் வேலைக்கு  நடந்து செல்கிறார்கள், மேலும் பெண்கள் பயணம் செய்யும் போது மலிவான கட்டணத்தை கருத்தில் கொள்கிறார்கள் என்று அறிக்கை கூறியுள்ளது. 

ஒடிசா ஆலையை கையகப்படுத்தும் ஜிண்டால்

ஜிண்டால் ஸ்டீல் அண்ட் பவர் லிமிடெட் (ஜேஎஸ்பிஎல்) மோனெட் பவர் கம்பெனியின் ஒடிசாவை தளமாகக் கொண்ட ஆலையை ரூ.410 கோடிக்கு வாங்கியதாக உறுதிப்படுத்தியது. நிறுவனம் பங்குகளை வாங்காமல், மொத்தமாக கையகப்படுத்தல் நடந்துள்ளது என்றும் கூறியுள்ளது. மோனெட் பவர் கம்பெனியின் 1,050 மெகாவாட் மின் உற்பத்தி நிலையம் ஒடிசாவின் அங்குல் மாவட்டத்தில் உள்ள மாலிபிரமணி அருகே அமைந்துள்ளது.
 

இந்தியா-இங்கிலாந்து பேச்சுவார்த்தை

இந்தியா மற்றும் இங்கிலாந்து இடையே முன்மொழியப்பட்ட தாராள வர்த்தக ஒப்பந்தம் தொடர்பான ஆறாவது சுற்று பேச்சுவார்த்தை திங்கள்கிழமை தொடங்கியது. ஆட்டோமொபைல் துறையில் இந்தியாவிடமிருந்து வரிச் சலுகைகளை இங்கிலாந்து அதிகாரிகள் கோருகின்றனர். மத்திய அமைச்சர் பியூஷ் கோயல் கூறும்போது, “எங்களுக்கு கொஞ்சம் பிடிப்பு ஏற்படும் வகையில் பேச்சுவார்த்தை மிக வேகமாக முன்னேறி வருகிறது” என்றார்.

முதன்மை எண்ணெய் சப்ளையர் ரஷ்யா

‘எரிசக்தி சரக்கு டிராக்கர் வோர்டெக்சாவின்’ தரவுகளின்படி, நவம்பரில் இந்தியாவின் முதன்மையான எண்ணெய் சப்ளையராக ரஷ்யா இருந்தது. இந்த மாதத்தில் இந்தியாவிற்கு ஒரு நாளைக்கு 9,09,403 பீப்பாய்கள் கச்சா எண்ணெய்யை வழங்கியதன் மூலம் இராக் மற்றும் சவூதி அரேபியாவை ரஷ்யா விஞ்சியுள்ளது. இப்போது இந்தியாவின் எண்ணெய் விநியோகத்தில் ஐந்தில் ஒரு பங்கை ரஷ்யா கொண்டுள்ளது.

நேரடி வரி வசூல் 24% அதிகரிப்பு

நடப்பு நிதியாண்டின் ஏப்ரல்-நவம்பர் மாதங்களில் நிகர நேரடி வரி வசூல் 24% அதிகரித்து ரூ.8.77 லட்சம் கோடியாக உள்ளது என்று நிதி அமைச்சகம் திங்கள்கிழமை தெரிவித்துள்ளது. 2022-23 நிதியாண்டுக்கான (ஏப்ரல்-மார்ச்) பட்ஜெட் மதிப்பீடுகளில் 61.79% வசூல் ஆகியுள்ளது. இந்த நிதியாண்டில் நேரடி வரி வசூல் ரூ.14.10 லட்சம் கோடியாக இருக்கும் என பட்ஜெட் மதிப்பிட்டிருந்தது.

முதல் 10 மதிப்புமிக்க நிறுவனங்கள்

2022 ஹுருன் குளோபல் 500 பட்டியலின்படி, ஆப்பிள் 2.4 டிரில்லியன் டாலர் மதிப்பீட்டைக் கொண்ட உலகின் மிக மதிப்புமிக்க நிறுவனமாகும். அதைத் தொடர்ந்து மைக்ரோசாப்ட் (1.8 டிரில்லியன் டாலர்), ஆல்பாபெட் (1.3 டிரில்லியன் டாலர்) மற்றும் அமேசான் (1.2 டிரில்லியன் டாலர்) ஆகியவை உள்ளன. டெஸ்லா 672 பில்லியன் டாலர் மதிப்பீட்டில் 5வது இடத்தைப் பிடித்தது. அதேசமயம் பெர்க் ஷையர் ஹாத்வே 624 பில்லியன் டாலர் மதிப்புடன் 6வது இடத்தைப் பிடித்தது. 

பாதியை இழந்தது டெஸ்லா

ஏப்ரல் மாதத்தில் எலோன் மஸ்க் ட்விட்டரை ஏலம் எடுத்ததில் இருந்து அவரது டெஸ்லா நிறுவனம் அதன் சந்தை மதிப்பில் பாதியை இழந்துள்ளது. ஏப்ரல் 13 அன்று நிறுவனத்தின் பங்குகள் 340.79 டாலரில் வர்த்தகம் செய்யப்பட்டாலும், ட்விட்டர் நிறுவனத்தை வாங்குவதற்கான தனது முயற்சியை எலன் மஸ்க் வெளிப்படுத்துவதற்கு ஒரு நாள் முன்பு, பங்கு 49% குறைந்து 173.44 டாலராக இருந்தது. ட்விட்டரை வாங்குவதற்கு நிதியளிப்பதற்காக ஏப்ரலில்  20 பில்லியன் டாலர் பெறுமான டெஸ்லா பங்குகளை மஸ்க் விற்றார்.

ட்விட்டர் பொருட்கள் ஏலம் 

ட்விட்டர் அதன் சான் பிரான்சிஸ்கோ தலைமையகத்திலிருந்து “உபரி அலுவலக சொத்துக்களை” அடுத்த மாதம் ஏலத்தில் விற்கிறது. நாற்காலிகள், பீட்சா ஓவன்கள், காபி தயாரிப்பு இயந்திரங்கள், பீர் டிஸ்பென்சர்கள், போனை சார்ஜ் செய்யும் இயந்திரங்கள், ட்விட்டர் பறவை சிலை போன்றவை அடங்கும். ஏலத்தைக் கையாளும் ஹெரிடேஜ் குளோபல் பார்ட்னர்கள், இந்த விற்பனையானது, நிறுவனத்தின் நிதியுடன் தொடர்புடையது அல்ல என்று கூறியுள்ளனர். 

பிஎஸ்என்எல் நிகர இழப்பு ரூ.57,671 கோடி

தொடக்கத்தில் இருந்து, பிஎஸ்என்எல் நிறுவனத்தின் மொத்த நிகர இழப்பு ரூ.57,671 கோடியாகவும், எம்டிஎன்எல் நிறுவனத்தின் நிகர இழப்பு மார்ச் 31-ஆம் தேதியின்படி ரூ.14,989 கோடியாகவும் உள்ளது என்று தகவல் தொடர்புத் துறை அமைச்சர் தேவுசின் சவுகான் நாடாளுமன்றத்தில் தெரிவித்தார். பல ஆண்டுகளாக அதிக ஊழியர் செலவு மற்றும் கடுமையான போட்டி ஆகியவை இழப்புகளுக்கான சில காரணங்களாக அவர் குறிப்பிட்டார். இந்த ஆண்டின் தொடக்கத்தில், பிஎஸ்என்எல் நிறுவனத்திற்கு ரூ.1.64 லட்சம் கோடி மதிப்பிலான மறுமலர்ச்சித் திட்டத்தை அரசாங்கம் அனுமதித்தது.