Theekkathir

தலச்சேரி, ஏப். 10-

கேரளத்தில் காங்கிரசுக்கு ஒரு இடம் கூட கிடைக்காது என்றும், காங்கிரஸ் தலைமையிலான ஐக்கிய ஜனநாயக முன்னணி(யுடிஎப்) படுதோல்வி அடையும் என்றும் மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பினராயி விஜயன் கூறினார்.

நாடு முழுவதும் 11 மாநிலங்கள் மற்றும் 3 யூனியன் பிரதேசங்களில் 91 தொகுதிகளில் வியாழனன்று மூன்றாவது கட்டத் தேர்தல் நடைபெற்றது. கேரளத்தில் உள்ள 20 தொகுதிகளிலும் வாக்குப்பதிவு அமைதியாகவும் பெரும் உற்சாகத்துடனும் நடைபெற்றது.

காலை முதலே விறுவிறுப்பாக நடைபெற்ற இத்தேர்தலின் முடிவில் மொத்தமுள்ள 2.43 கோடி வாக்காளர்களில் சுமார் 74 சதவீதம் பேர் வாக்களித்ததாக இரவு 7 மணியளவில் தேர்தல் ஆணையத் தகவல்கள் தெரிவித்தன.

பினராயி உறுதி : முன்னதாக, கண்ணூர் மாவட்டம் தலச்சேரி தாலுகாவில் கள்ள பினராயிகிராமத்தில் ஆர்.சி அமலா பள்ளிக்கூடத்தில் வாக்களித்த பின் நிருபர்களுக்குபேட்டியளித்த பினராயி விஜயன்மேலும் கூறியதாவது:காங்கிரஸ் மீது மக்களிடம் கடும் கோபம் உள்ளது.

அவர்கள் அனைவரும் யுடிஎப் கூட்டணிக்கு பாடம் கற்பிப்பதற்காக காலை முதலே வரிசையில் காத்திருக்கிறார்கள். அனைத்து இடங்களிலும் இதுதான் நிலைமை. வாக்குப்பதிவு அதிகரிக்க அதிகரிக்க இடது ஜனநாயக முன்னணியின் (எல்டிஎப்) வெற்றி வாய்ப்பு அதிகரிக்கும். கேரளா முழுவதும் இடதுஜனநாயக முன்னணிக்கு சாதகமான சூழல்நிலவுகிறது.

காலையிலேயே பெருமளவு வாக்குப்பதிவு நடந்திருப்பதில் அசாதாரணம் எதுவும்இல்லை. அந்தளவுக்கு அசாதாரணமான நடவடிக்கைகளை யுடிஎப் அரசு மக்களுக்கு எதிராக மேற்கொண்டுள்ளது. அதற்கு பதிலடி கொடுப்பதற்காகத்தான் மக்கள் நீண்டவரிசையில் நின்று வாக்களிக்கிறார்கள். ஒரு இடம் கூட காங்கிரசுக்கு கேரளத்திலிருந்து கிடைக்கப்போவதில்லை.இந்தத் தேர்தலோடு யுடிஎப் கூட்டணி தகர்ந்துவிடும்.

அதையொட்டி அரசும் கவிழும். இந்த தேர்தலுக்குப் பின் அது நிகழும். நாங்கள் எம்எல்ஏக்களை வலைவீசிப் பிடித்து ஆட்சியை கீழே இறக்க வேண்டியதில்லை. மக்களின் உணர்வு இந்தளவுக்கு தீவிரமாக உள்ளசூழ்நிலையில் யுடிஎப் அரசு இயல்பாகவே கவிழும் நிலை ஏற்படும். மலைப்பகுதிகளில் உள்ள மக்களின் கோபம் தேர்தலில் வலுவாக பிரதிபலிக்கும்.

இந்த கோபமும், ஆத்திரமும் யுடிஎப்புக்கு எதிராக குறிப்பாக காங்கிரசுக்கு எதிராக உருப்பெரும்.இவ்வாறு பினராயி விஜயன் கூறினார்.

வி.எஸ்.அச்சுதானந்தன் : யுடிஎப் அரசின் மக்கள் விரோதக் கொள்கைகளுக்கு எதிராக மக்கள் தங்களின் கருத்தை வலுவாகப் பதிவுசெய்வார்கள் என்று எதிர்க்கட்சித்தலைவர் வி.எஸ்.அச்சுதானந்தன் ஆலப்புழையில் நிருபர்களுக்கு அளித்த பேட்டியில் கூறினார்.

புன்னப்புராவில் வாக்களித்த பின் அவர் நிருபர்களிடம் மேற்கண்டவாறு கூறினார்.யுடிஎப் ஆட்சிக்கு எதிரான மக்கள் உணர்வு தேர்தலில் பிரதிபலித்துள்ளது என்று எதிர்க்கட்சித் துணைத்தலைவர் கொடியேரி பாலகிருஷ்ணன் கூறினார். காலை முதலே வாக்காளர்கள் நீண்ட வரிசையில் காத்திருந்து வாக்களித்ததை காணமுடிந்தது.

வாக்குப்பதிவு அதிகரிக்கும் அளவுக்கு இடது ஜனநாயக முன்னணிக்கு இடங்கள் அதிகரிக்கும் என்றும் அவர்கூறினார். கொடியேரி ஜூனியர் பேசிக்அன்ட் பிரி பேசிக்பள்ளிக்கூடத்தில் வாக்களித்த பின் நிருபர்களிடம் அவர் பேசினார்.

ஏ.கே.அந்தோணி ; கேரளத்தில் 1977 தேர்தல் முடிவுமீண்டும் திரும்பும் என்றும், அனைத்துஇடங்களையும் யுடிஎப் கூட்டணி கைப்பற்றும் என்றும் மத்திய அமைச்சர் ஏ.கே.அந்தோணி கருத்து தெரிவித்தார். முதலமைச்சர் உம்மன்சாண்டியும் யுடிஎப் கூட்டணி பெறும் வெற்றிபெறும் என்று கூறிக்கொண்டார்.