பிரசவத்தில் தப்பிப்பாரா கென்யா பெண்?
19 Nov 2025, 3:33 pm
<p><strong>பிரசவத்தில் தப்பிப்பாரா கென்யா பெண்?</strong></p>
<p>தென் ஆப்பிரிக்கா தலைமை வகிக்கும் G20 அமைத்த ஆய்வுக்குழு உலகளாவிய சமத்துவமின்மைகளை ஆய்வு செய்து அறிக்கை ஒன்றை அண்மையில் வெளியிட்டுள்ளது. ஆய்வுக் குழுவின் தலைவராக பொருளாதார நிபுணர் ஜோசப் ஸ்டிக்லிட்ஸ் இருந்துள்ளார். இதன் அறிக்கை அதிர்ச்சி தரத்தக்க பல உண்மைகளை வெளிக்கொண்டு வந்துள்ளது. 83 % நாடுகள் சமத்துவமின்மை உடைய நாடுகளாக விளங்குகின்றன. இங்கு வாழும் மக்கள் உலக மக்கள் தொகையில் 90 % ஆக உள்ளனர். உலக அளவில் 2000–2024 காலத்தில் உருவான புதிய செல்வத்தின் 41% ஐ மேல்தட்டில் உள்ள டாப் 1% பேர் கைப்பற்றியுள்ளனர்; அதே சமயம் அடித்தளத்தில் உழலும் 50% மக்களுக்கு வெறும் 1% மட்டுமே கிடைத்துள்ளது. இந்தியாவில் டாப் 1% பேர் தங்களின் செல்வப் பங்கை 62% அதிகரித்துள்ளனர். இங்கு பொருளாதார வளர்ச்சி இருப்பதாக தம்பட்டம் அடிக்கப்பட்டாலும் வளர்ச்சியின் பயன்கள் யாரிடம் போய்ச் சேர்ந்திருக்கின்றன என்பதை இந்த ஆய்வு அம்பலப்படுத்தி இருக்கிறது. வளர்ச்சியும் சமத்துவமின்மையும் ஒரு சேர வளர்வது பொருளாதார மறு பங்கீட்டில் நிகழும் அநீதிக்கு சாட்சியமாகும். 2020க்கு பின் உலகளாவிய வறுமை குறைப்பு மந்தமடைந்துள்ளது. 230 கோடி மக்கள் உணவுக் குறைபாடுடன் வாழ்கின்றனர், மேலும் 130 கோடி பேர் தனியார் மருத்துவச் செலவுகளால் வறுமைக்கு தள்ளப்பட்டுள்ளனர். “சமத்துவமின்மை அதிகரித்துள்ள நாடுகளில் ஜனநாயக உரிமைகள் அரிக்கப்படும் வாய்ப்பு சமத்துவம் நிலவும் நாடுகளை விடஏழு மடங்கு அதிகமாக உள்ளது.” என்கிறது அறிக்கை. “கென்யாவில் இருக்கும் ஒரு பெண் பிரசவத்தின் போது உயிரிழக்கும் வாய்ப்பு ஸ்வீடன் பெண்ணை விட 37 மடங்கு அதிகம்” என்ற அறிக்கை மனிதர்களுக்குள் உள்ள ஏற்றத்தாழ்வை மட்டுமின்றி, நாடுகளுக்குள் உள்ள ஏற்றத்தாழ்வையும் வெளிக் கொணர்ந்து அதிர வைக்கிறது. இந்த ஆய்வு அறிக்கையை இணைத்து எழுதியுள்ள கடிதத்தில் நிபுணர்கள் கூறி இருக்கும் கருத்துக்கள் மிக முக்கியமானவை. “செல்வத்தின் அதீதக் குவிப்புகள், ஜனநாயக விரோதமான அதிகாரக் குவிப்புகளாக மாறுகின்றன. நமது சமூகங்களில் நம்பிக்கையை சிதைத்து, தீவிரமாகப் பிளவுபடுத்துகின்றன என்பதை ஆழ்ந்த கவலையுடன் பதிவு செய்கிறோம். சமத்துவமின்மை என்பது தவிர்க்க முடியாத ஒன்று அல்ல; அது ஒரு கொள்கைத் தேர்வு” க.சுவாமிநாதன்</p>