புதிர் விளையாட்டு - மஞ்சு

<p><strong>புதிர் விளையாட்டு - மஞ்சு</strong></p><p>அழகு ரோஜாக்களே, உங்களின் சிந்தனைச் செடி நன்கு வளர்வதற்கு நீர் ஊற்றுவது போல, இன்று புதியதொரு கதையை வைத்து விளையாடுவோம்! ஓகேதானே? </p><p><strong>வித்தன் வென்றது எப்படி?</strong> </p><p>ஒரு ஊரில் பெரிய செல்வந்தர் ஒருவர் இருந்தார். அவருடைய தோட்டத்தைப் பராமரிக்கும் ஏழைத் தொழிலாளிகளில் ஒருவரின் பெயர் வித்தன். தொழிலாளிகளைக் கடுமையாக வேலை வாங்கிய செல்வந்தர் நியாயமான கூலியைத் தராமல் ஏமாற்றி வந்தார். ஒருநாள் வித்தன் எல்லாத் தொழிலாளிகள் சார்பாகவும், செல்வந்தரைச் சந்தித்து சரியான கூலியைக் கொடுக்க வலியுறுத்தினார். இதனால் செல்வந்தர் வித்தனை வேலையிலிருந்து வெளியேற்ற நினைத்தார். ஒருநாள், செல்வந்தரின் வைர மோதிரம் காணாமல் போனது. வித்தன் மீது பழி போடத் திட்டமிட்ட செல்வந்தர், ஊர்க் கூட்டத்தில் “வித்தனைத் தவிர வேறு யாரும் என் வீட்டுக்குள் வர மாட்டார்கள். ஆகவே அவன்தான் திருடியிருக்க வேண்டும்” என்று முறையிட்டார். ஊர் நடுவர் இருவரையும் விசாரித்தார். வித்தன், “ஐயா, நான் உழைத்து வாழ்பவன். திருடும் எண்ணம் எனக்குக் கனவிலும் வராது” என்று கூறினார். நடுவர் சற்று யோசித்தார். பிறகு தன் திட்டத்தை அறிவித்தார். “நாளை காலை உங்கள் இருவருக்கும் ஒரு போட்டி. ஊர் எல்லையில் இருக்கும் குளத்தில் இருந்து, ஆளுக்கு ஒரு குடத்தில் தண்ணீரை நிரப்பிக்கொண்டு, ஊரின் நடுவில் இருக்கும் ஆலமரத்தை அடைந்து அதன் வேரில் ஊற்ற வேண்டும். யார் முதலில் நிறையத் தண்ணீர் ஊற்றுகிறீர்களோ, அவர் சொல்வதே உண்மை என ஏற்கப்படும். தண்ணீரைத் தலையிலோ, தோளிலோ சுமந்து வரக்கூடாது. கைகளில்தான் ஏந்தி வர வேண்டும்,” என்றார். செல்வந்தர் உற்சாகமானார். ‘வித்தன் ஏழை. நடந்து வரும்போது அவனால் விரைவாக ஆலமரத்தை அடைய முடியாது. நானோ கையில் குடத்தைப் பிடித்துக்கொண்டே எனது குதிரை வண்டியில் ஏறி முதலில் ஆலமரத்தை அடைந்துவிடுவேன்,’ என்று மனதுக்குள் கணக்குப் போட்டார். மறுநாள் காலை போட்டி தொடங்கியது. செல்வந்தர் தன் திட்டப்படி வண்டியில் ஏறி குடத்தைப் பிடித்துக்கொண்டு குதிரையை வேகமாக விரட்டினார். வித்தன் தன் கால்களை நம்பி குடத்தைத் தூக்கிக்கொண்டு நிதானமாக நடந்தார். இறுதியில், ஆலமரத்தடியில் முதலில் அதிகமான தண்ணீரை ஊற்றியவர் வித்தன்தான் என்று அறிவிக்கப்பட்டது. வழக்கில் அவர் வென்றார். வண்டியில் வந்தும் தோற்றுப்போன செல்வந்தர் மன்னிப்புக் கோரினார். குதிரை வண்டியில் வேகமாக வந்த செல்வந்தரை விட, நடந்து வந்த வித்தன் எப்படி முதலில் அதிக நீர் ஊற்றிப் போட்டியில் வென்றார்?</p><p><strong>விடை</strong></p><p>யார் முதலில் நிறையத் தண்ணீர் ஊற்றுகிறார்களோ அவருக்கே வெற்றி என்றுதானே நடுவர் அறிவித்திருந்தார்? குதிரை வண்டி குலுங்கிக் குலுங்கித்தானே வந்திருக்கும்? ஆகவே செல்வந்தரின் குடத்தில் இருந்த தண்ணீரில் பாதி அளவு வழியிலேயே சிந்திவிட்டது. அவர் முதலில் வந்தாலும் ஆலமர வேரில் மீதியிருந்த நீரைத்தான் ஊற்ற முடிந்தது. ஆனால், உழைப்பாளி வித்தன் நிதானமாகத் தடுமாறாமல் நடந்து வந்ததால், சிந்தாமல் சிதறாமல் முழு அளவு தண்ணீரையும் கொண்டு வந்து ஊற்றினார். வேகத்தை விட விவேகமும், உழைப்பின் அருமையுமே வெல்லும் என்ற உண்மையை சரியாக ஊகித்த அறிவுப் பிஞ்சுகளுக்கு ‘பாலர் பூங்கா’ வாழ்த்துகள்.</p>