பழம்பெரும் திரைக்கலைஞர் ‘சவுகார்’ ஜானகி மறைந்தார்!

<p><strong>பழம்பெரும் திரைக்கலைஞர் ‘சவுகார்’ ஜானகி மறைந்தார்!</strong></p><p>சென்னை, ஆக. 21 -தமிழ்த் திரையுலகின் பழம்பெரும் திரைக்கலைஞர் ‘சவுகார்’ ஜானகி காலமானார். அவருக்கு வயது 94. </p><p>உடல்நலக்குறைவால் சென்னை ஆழ்வார்பேட்டையில் உள்ள தனியார் மருத்துவமனையில் தீவிர சிகிச்சை பிரிவில் அனுமதிக்கப்பட்டிருந்த சவுகார் ஜானகி, சிகிச்சை பலனின்றி வெள்ளிக்கிழமை (ஆக. 21) அன்று பிற்பகல் காலமானார்.</p><p>1950-இல் ‘சவுகாரு’ தெலுங்கு படம் மூலம் திரையுலகில் அறிமுகமான ஜானகி, தமிழ், தெலுங்கு, கன்னடம், மலையாளம் மற்றும் இந்தி மொழிகளில் 400-க்கும் மேற்பட்ட திரைப்படங்களில் நடித்துள்ளார். தமிழில் புதிய பறவை, எதிர் நீச்சல், பாமா விஜயம், பார் மகளே பார், நீர்க்குமிழி, இரு கோடுகள், படிக்காத மேதை, பாக்யலட்சுமி போன்ற படங்களில் அவரின் நடிப்பு பெரிதும் பேசப்பட்டது.</p><p>70 ஆண்டுகளுக்கும் மேலான கலைப்பயணத்தில், ‘காவியத்தலைவி’, ‘ரங்கராட்டினம்’ போன்ற படங்களைச் சொந்தமாக தயாரித்தும் நடித்தார்.</p><p>எம்.ஜி.ஆர், சிவாஜி கணேசன், ஜெமினி கணேசன் முதல் ரஜினி, கமல் வரை பல தலைமுறை நடிகர்களுடன் இணைந்து நடித்தவர். என்.டி.ஆர், எம்.ஜி.ஆர், கலைஞர் மு.கருணாநிதி மற்றும் ஜெயலலிதா ஆகிய 4 முதலமைச்சர்களுடன் இணைந்து நடித்த பெருமைக்குரியவர். தமிழில் இவர் கடைசியாக நடித்த படம் ‘பிஸ்கோத்’.</p><p>சவுகார் ஜானகியின் கலைச் சேவையைப் பாராட்டி, இந்திய அரசு 2022-இல் பத்மஸ்ரீ விருது வழங்கியது. தமிழ்நாடு அரசின் கலைமாமணி, ஆந்திர மாநில அரசின் ‘நந்தி’ விருதுகளையும் பெற்றுள்ளார். இவரது மறைவுக்குத் தமிழ்நாடு முதலமைச்சர் ஜோசப் விஜய் மற்றும் கமல்ஹாசன் உள்ளிட்ட திரைக்கலைஞர்கள் ஆழ்ந்த இரங்கலைத் தெரிவித்துள்ளனர்.</p>