மார்க்சிஸ்ட் கட்சி வெற்றி பெற்ற பிறகு தண்ணீர் பிரச்சினையை பெருமளவு தீர்த்துள்ளோம்! வெள்ளகோவில் நகர்மன்ற உறுப்பினர் ராதாமணி

<p><strong>மார்க்சிஸ்ட் கட்சி வெற்றி பெற்ற பிறகு தண்ணீர் பிரச்சினையை பெருமளவு தீர்த்துள்ளோம்!</strong></p><p><strong>வெள்ளகோவில் நகர்மன்ற உறுப்பினர் ராதாமணி</strong></p><p>வெள்ளகோவில், நவ. 15-வெள்ளகோவில் நகராட்சி 7-வது வார்டில் தொடர்ச்சியாக நான்குமுறை தோல்வியடைந்தாலும், ஐந்தாவது முறை போட்டியிட்டு மார்க்சிஸ்ட் கம்யூனிஸ்ட் கட்சி வெற்றி பெற்றுள்ளது. இந்த வார்டின்நகர்மன்ற உறுப்பினராக சிறப்பாக பணியாற்றி வரும் ராதாமணி கூறியதாவது:“மார்க்சிஸ்ட் கட்சி வெற்றி பெற்ற பிறகு, எங்கள் வார்டில் நிலவிய உப்புத் தண்ணீர் பிரச்சினையை பெருமளவு தீர்த்துள்ளோம். ஸ்ரீராம் நகர் பகுதியில் ரூ. 3.5 லட்சம் மதிப்பீட்டில் ஆழ்துளைக் கிணறுகள், சின்டெக்ஸ் தொட்டி மற்றும்மோட்டார் அமைத்து 15 குழாய்களும், 6 தெருவிளக்குகளும் அமைக்கப்பட்டுள்ளன.</p><p>நடேசன் நகர் பகுதியில் ஆழ்துளைக் கிணறு, 4 சின்டெக்ஸ் தொட்டிகள் மற்றும் மோட்டார் அமைத்து 73 உப்புத் தண்ணீர் குழாய்கள் வழங்கப்பட்டுள்ளன. மேலும், நடேசன் நகர் தெற்குப் பகுதியில் ரூ. 4.5 லட்சம் மதிப்பீட்டில் ஆழ்துளைக்கிணறும், 4-வது வீதியில் ரூ. 2.5 லட்சம் மதிப்பீட்டில் ஆழ்துளைக் கிணறுடன் சின்டெக்ஸ் தொட்டியும் அமைக்கப்பட்டுள்ளன. 3-வது வீதியில் சாலையின் நடுவில் இடையூறாக இருந்த அடிகுழாய் அகற்றப்பட்டு, ரூ. 3.5 லட்சம் செலவில் ஆழ்துளைக் கிணறு மற்றும் மோட்டார் அறை அமைக்கப்பட்டுள்ளது. 2-வது வீதியில் தண்ணீர் தொட்டி,மோட்டார் அமைத்து மூன்று வீதிகளுக்கு 9 குழாய்கள் வழங்கப்பட்டுள்ளன.</p><p>இப்பகுதியில் 5 தார்சாலைகள், 45 தெருவிளக்குகள் அமைக்கப்பட்டதோடு, பள்ளிக்குழந்தைளின் பாதுகாப்பு கருதி பொதுக்கிணற்றுக்கு கம்பி வலையும் அமைத்துக் கொடுத்துள்ளோம். மேலும்,பொதுமக்களுக்கு 60 ரேஷன் கார்டுகள், 45 ஆதார் கார்டுகள், 27 முதியோர் ஓய்வூதியம், 17 மாற்றுத்திறனாளி உதவித்தொகை, 7 வீட்டுமனைப் பட்டாக்கள் மற்றும் 58 வீடுகளுக்குக் கழிப்பிடம் கட்ட தலா ரூ. 8,000 மானியம் பெற்றுத் தரப்பட்டுள்ளது.</p><p>மற்ற நகராட்சிகளை போல வெள்ளகோவிலிலும் சொத்து வரி உயர்த்தப்பட்டபோது மார்க்சிஸ்ட் கட்சி கடுமையாக எதிர்த்தது. அம்ருத் திட்டத்தில் குழாய் பதிப்பதற்காக தோண்டப்பட்ட சாலைகள் சீரமைக்கப்படாததால் நகரமே பழுதடைந்துள்ளது. எங்கள் வார்டில் தொடர் வலியுறுத்தலுக்குப் பிறகு 5 சாலைகள் புதுப்பிக்கப்பட்டுள்ளன; இன்னும் 20 சாலைகள் சீரமைக்கப்பட வேண்டியுள்ளது.</p><p>மிக முக்கியமாக, காவிரி கூட்டுக் குடிநீர் திட்டத்தில் முன்பு 5 நாட்களுக்கு ஒருமுறை கிடைத்தகுடிநீர், தற்போது 10 முதல் 15 நாட்களுக்கு ஒருமுறைதான் கிடைக்கிறது. கொடுமுடியில் மோட்டார் பழுது, மழை போன்ற காரணங்களை கூறாமல், 21 வார்டுகளிலும் நிலவும் குடிநீர்த் தட்டுப்பாட்டை போக்கி 3 நாட்களுக்கு ஒருமுறை குடிநீர்வழங்க நகராட்சி நிர்வாகம் நடவடிக்கை எடுக்க வேண்டும்.</p><p>மக்கள் பிரச்சினைகளைக் கொண்டு செல்லும்போது நகராட்சி நிர்வாகம் ஓரளவு ஒத்துழைப்பு அளித்தாலும், கடந்தஆறு மாத காலத்தில் பெரிய அளவில் எந்த பணிகளும் நடைபெறவில்லை” என்றார்.</p><p>மார்க்சிஸ்ட் கட்சியின் காங்கேயம் தாலுகா குழுஉறுப்பினர் கருப்பசாமியும், நகர்மன்ற உறுப்பினர் ராதாமணியின் கணவர், மார்க்சிஸ்ட் கட்சியைசேர்ந்த முருகனும் ராதாமணியின் பணிகளுக்கு ஒத்துழைப்பு கொடுத்து மக்கள் பிரச்சனையில் கவனம் செலுத்திவருகின்றனர்.</p>