4 தொழிலாளர் சட்டத் தொகுப்புகளை எதிராக சட்டமன்றத்தில் தீர்மானம் நிறைவேற்றுக! யுனைட் ஊழியர் சங்கம் வலியுறுத்தல்

<p><strong>4 தொழிலாளர் சட்டத் தொகுப்புகளை எதிராக சட்டமன்றத்தில் தீர்மானம் நிறைவேற்றுக! யுனைட் ஊழியர் சங்கம் வலியுறுத்தல்</strong></p><p>சென்னை, மே 11 – ஒன்றிய அரசு கொண்டு வந்துள்ள 4 தொழிலாளர் சட்டத் தொகுப்புகளை தமிழகத்தில் அமல்படுத்த மாட்டோம் என்று சட்டமன்றத்தில் தீர்மானம் நிறைவேற்ற வேண்டுமென்று ஐடி ஊழியர் சங்கம் கோரிக்கை விடுத்துள்ளது. </p><p>ஐடி ஊழியர்கள் சங்கத்தின் (யுனைட்) தென்சென்னை மாவட்ட அமைப்பு மாநாடு திங்களன்று (மே 11) கிண்டியில் உள்ள விபிசி நினைவு இல்லத்தில் நடைபெற்றது.</p><p> புதிதாக பொறுப்பேற்றுள்ள தமிழ்நாடு அரசிற்கு வாழ்த்து தெரிவித்துள்ள மாநாடு, ஒன்றிய அரசு அமல்படுத்தியுள்ள 4 தொழிலாளர் சட்டத் தொகுப்புகள் ஐடி மற்றும் ஐடி சார்ந்த ஊழியர்களின் பணியிலும், சமூக பாதுகாப்பு, உடல் மற்றும் மன நிலையிலும் பாதகமான தாக்கத்தை ஏற்படுத்தும்.</p><p> எனவே, புதிதாக பதவியேற்றுள்ள தமிழக அரசு இந்த சட்டத் தொகுப்பை அமல்படுத்த மாட்டோம் என்று சட்டமன்றத்தில் தீர்மானம் நிறைவேற்ற வேண்டும் என்று கோரியுள்ளது.</p><p> ஐடி மற்றும் ஐடி சார்ந்த ஊழியர்கள் பிரச்சனைகளுக்கு தீர்வுகாண முத்தரப்பு பேச்சுவார்த்தை குழுவை உடனடியாக அமைக்க வேண்டும் என்றும் மாநாடு கோரியுள்ளது. </p><p>மாநாட்டில், நொய்டாவில் போராடி வரும் தொழிலாளர்களுக்கு சங்கத்தின் சார்பில் ரூ.10 ஆயிரம் வழங்கப்பட்டது. </p><p> பரணிதரன் தலைமையில் நடைபெற்றது இந்த மாநாட்டை, சிஐடியு மாநில பொதுச்செயலாளர் எஸ்.கண்ணன் துவக்கி வைத்தார்.</p><p> சிஐடியு மாநிலச்செயலாளர் கே.சி. கோபிகுமார், தென்சென்னை மாவட்டத் தலைவர் ஏ.முருகானந்தம், செயலாளர் ஜி.செந்தில்குமார் உள்ளிட்டோர் பேசினர். </p><p>சங்கத்தின் அமைப்பு செயலாளராக வினோத், பிரச்சார செயலாளராக ஜெயின், பொருளாளராக ரோஹித் உட்பட 7 பேர் கொண்ட மாவட்ட நிர்வாககுழுவும், 14 பேர் கொண்ட மாவட்டக்குழுவும் தேர்வு செய்யப்பட்டது.</p>