இந்தியாவில் 25 லட்சம் பேர் வறுமைக்குள் தள்ளப்படும் அபாயம் – ஐநா அறிக்கை!

<p>மேற்கு ஆசியாவில் நீடித்து வரும் போர் மற்றும் அதனால் ஏற்பட்டுள்ள உலகளாவிய பொருளாதார அதிர்வுகள் இந்தியாவிலும் தாக்கத்தை ஏற்படுத்தக்கூடும் என ஐநா வளர்ச்சி திட்டம் (UNDP) எச்சரித்துள்ளது.</p><p>ஐநா வெளியிட்டுள்ள சமீபத்திய மதிப்பீட்டு அறிக்கையின்படி, இந்தப் போர் காரணமாக எரிசக்தி விலை உயர்வு, உணவுப் பொருட்களின் செலவு அதிகரிப்பு போன்ற காரணிகள் இந்தியாவின் வறுமை நிலையை மேலும் மோசமாக்கும் அபாயம் இருப்பதாக கூறப்பட்டுள்ளது.</p><p><strong>அறிக்கையில் கூறப்பட்டுள்ளதாவது:</strong></p><p>இந்தியாவின் வறுமை விகிதம் தற்போதைய 23.9% இலிருந்து 24.2% ஆக உயரக்கூடும். இதனால், சுமார் 25 லட்சம் பேர் கூடுதலாக வறுமைக் கோட்டிற்கு கீழ் தள்ளப்படலாம். மொத்தமாக வறுமைக் கோட்டிற்கு கீழ் வாழ்பவர்களின் எண்ணிக்கை 35.4 கோடி வரை அதிகரிக்கக்கூடும் என கணிக்கப்பட்டுள்ளது.</p><p>மேலும், எரிபொருள் மற்றும் உணவுப் பொருட்களின் விலை உயர்வு காரணமாக நடுத்தர மற்றும் குறைந்த வருமானக் குடும்பங்கள் அதிகளவில் பாதிக்கப்படுவார்கள் என்றும் அறிக்கை எச்சரிக்கிறது. குறிப்பாக நகர்ப்புற ஏழைகள் மற்றும் அந்நிய தொழிலாளர்கள் அதிக பாதிப்பைச் சந்திக்கும் வாய்ப்பு உள்ளது.</p><p>அதே நேரத்தில், சமூக பாதுகாப்புத் திட்டங்கள் மற்றும் உணவுப் பாதுகாப்பு நடவடிக்கைகளை வலுப்படுத்துவதன் மூலம் இந்த தாக்கத்தை குறைக்க இந்திய அரசு முயற்சி மேற்கொள்ள வேண்டும் என்றும் ஐநா பரிந்துரைத்துள்ளது.</p><p>உலகளாவிய அரசியல் பதற்றங்கள் நேரடியாக இல்லாவிட்டாலும், அதன் பொருளாதார எதிரொலி இந்தியா போன்ற வளர்ந்து வரும் நாடுகளின் சமூக-பொருளாதார நிலைக்கு தாக்கத்தை ஏற்படுத்தும் என்பது இந்த அறிக்கையின் முக்கிய எச்சரிக்கையாகும்</p>