பிழைப்பு தேடி வந்த பல தொழிலாளர்களின் வாழ்க்கையை நிலைகுலையச் செய்த வாயுகசிவு

<p><strong>பிழைப்பு தேடி வந்த பல தொழிலாளர்களின் வாழ்க்கையை நிலைகுலையச் செய்த வாயுகசிவு</strong></p><p>திருவள்ளூர் மாவட்டத்தில் உள்ள ஒரு தனியார் கடல் உணவு ஏற்றுமதி நிறுவனத்தில் ஏற்பட்ட அமோனியா வாயு கசிவு விபத்து, ஒடிசாவிலிருந்து பிழைப்பு தேடி வந்த பல தொழிலாளர்களின் வாழ்க்கையை நிலைகுலையச் செய்துள்ளது. இந்த விபத்தில் உயிரிழந்தவர்களின் எண்ணிக்கை 15 ஆக உயர்ந்துள்ளது. சக நண்பர்கள் மற்றும் உறவினர்கள் மருத்துவமனையில் உயிருக்காகப் போராடி வரும் நிலையில், அங்கு பணிபுரிந்த ஒடிசாவைச் சேர்ந்த 62 தொழிலாளர்கள், தங்களது சோகமான நினைவுகளோடும், கடும் அதிர்ச்சியோடும் சொந்த ஊருக்குத் திரும்பி யுள்ளனர். </p><p><strong>துயரத்தோடு பயணம் </strong></p><p>சென்னை சென்ட்ரல் ரயில் நிலையத்திலிருந்து வெள்ளிக்கிழமை காலை ஒடிசா நோக்கிப் புறப்பட்ட அந்தத் தொழிலாளர்கள், வெறும் உடமைகளுடன், சொல்லொண்ணாத் துயரத்தோடு பயணம் மேற்கொண்டனர். அவர்களில் பலரிடம் பேசியபோது, &quot;இனிமேல் எந்தவொரு தொழிற்சாலையிலும் நாங்கள் வேலைக்குச் செல்லப் போவதில்லை&quot; என்று மிகுந்த மனவேதனையுடன் தெரிவித்தனர். இந்தத் துயரத்தின் உச்சமாக, ராஜமிகா ஜுவாங் என்ற 20 வயது இளம்பெண் தனது சகோதரி கீதா ஜுவாங்கின் (24) உயிரிழப்பு குறித்துக் கூட அறியாமல் இருந்துள்ளார். நிவாரண முகாமில் இருந்த அதிகாரிகளிடம் தனது சகோதரியின் உடல்நிலை குறித்துப் பலமுறை கேட்டபோதெல்லாம், அவருக்கு சரியான பதில் கிடைக்கவில்லை. இறுதியில், தனது சகோதரி இறந்த தகவல் அறிந்து நிலைகுலைந்து போனார். </p><p><strong>அதிகாரிகள் மீது குற்றச்சாட்டு </strong></p><p>சிகிச்சை பெற்றுத் திரும்பிய ஆனந்த் என்ற தொழிலாளியும், மீண்டும் ஒரு தொழிற்சாலைக்குள் கால் வைக்கப் போவதில்லை என்று உறுதியாகக் கூறினார். இத்தகைய சூழலில், தொழிலாளர் நல ஆர்வலர்கள் சிலர், தங்களின் உறவினர்கள் மருத்துவமனையில் அனுமதிக்கப்பட்டுள்ளதை அறிந்த தொழிலாளர்கள், ரயிலிலிருந்து இறங்க முயன்றும் அதிகாரிகள் அனுமதிக்கவில்லை என்று குற்றஞ்சாட்டியுள்ளனர். மேலும், தொழிலாளர்கள் தங்களின் குடும்பத்தினருடன் சுயமாகப் பேசுவதற்குக் கூட அதிகாரிகள் போதிய சுதந்திரம் அளிக்கவில்லை என்றும் கூறப்படுகிறது. ஒடிசா அரசு தங்களின் தொழிலாளர்களை அழைத்துச் செல்ல நடவடிக்கை எடுத்த ‘நிலையில், ஜார்க்கண்ட் போன்ற பிற மாநில அரசுகள் தங்களின் தொழிலாளர்களைக் பாதுகாக்கத் தவறியதாகச் செய்திகள் தெரிவிக்கின்றன. ஜார்க்கண்ட் தொழிலாளர்கள் தங்களை ஊருக்கு அழைத்துச் செல்லுமாறு தவிப்போடு கோரிக்கை விடுத்து வருகின்றனர். அதேநேரம், அசாம் மாநிலத்தைச் சேர்ந்த தொழிலாளர்களை அழைத்துச் செல்ல அந்த மாநில அரசு முன்வந்துள்ளதாகத் தகவல்கள் வெளியாகியுள்ளன. </p><p><strong>தரகர் கைது</strong> </p><p>இந்த விபத்து குறித்த சட்ட நடவடிக்கைகளும் தீவிரமடைந்துள்ளன. சிறுவர்கள் உட்பட வெளிமாநிலத் தொழிலாளர்களைப் பாதுகாப்பற்ற பணிச் சூழலுக்கு வேலைக்குச் சேர்த்ததாகக் கூறப்படும் முக்கியப் தரகர் சுரேஷ் (41) என்பவரைத் திருவள்ளூர் காவல்துறையினர் கைது செய்துள்ளனர். இதுவரை இந்த வழக்கில் நான்கு பேர் கைது செய்யப்பட்டுள்ளனர். தொழிற்சாலைகளின் லாபத்திற்காக ஏழைத் தொழிலாளர்களின் உயிரைப் பணயம் வைக்கும் இத்தகைய அவலநிலை, சமூகத்தின் மனசாட்சியை உலுக்கும் ஒரு பெரும் சோகமாக மாறியுள்ளது.</p>