ஹாங்காங் சர்வதேச யோகாசன போட்டி தமிழக மாணவர்கள் பதக்கங்கள் குவிப்பு

<p><strong>ஹாங்காங் சர்வதேச யோகாசன போட்டி தமிழக மாணவர்கள் பதக்கங்கள் குவிப்பு</strong></p><p>திருவள்ளூர், மே 14- ஹாங்காங்கில் நடைபெற்ற சர்வதேச யோகாசன போட்டியில், தமிழகத்தை சேர்ந்த, மாணவர்கள் பதக்கங்களை குவித்து சாதனை படைத்தனர். </p><p>ஹாங்காங் நாட்டில், ஹாங்காங் யோகாசன விளையாட்டு சம்மேளனம் சார்பில் சர்வதேச யோகாசன போட்டிகள், இம்மாதம், 9 மற்றும் 10ம் தேதிகளில் நடைபெற்றது. </p><p>இந்த போட்டியில், இந்தியா, மெக்சிகோ, ஆஸ்திரேலியா, சவுதி அரேபியா, சீனா, தாய்லாந்து, ஹாங்காங், மலேசியா, சிங்கப்பூர் உள்ளிட்ட, 16 நாடுகளை சேர்ந்த, 450 போட்டியாளர்கள் பங்கேற்றனர். </p><p>இந்தியா சார்பில் பங்கேற்ற அணியில், திருவள்ளூர் மாவட்டம், கும்மிடிப்பூண்டி பகுதியை சேர்ந்த, 15 மாணவர்கள், யோகா பயிற்சியாளர் சந்தியா தலைமையில் இடம் பெற்றிருந்தனர்.</p><p> வயது வாரியாக, பல்வேறு பிரிவுகளில் யோகாசன போட்டிகள் நடந்தப்பட்டன. </p><p>இந்த போட்டியில், 25 தங்கம், 17 வெள்ளி பதக்கங்களுடன், இந்திய அணி, பதக்கப் பட்டியலில் முதல் இடத்தை பிடித்தது. </p><p>அவர்களில், தமிழகத்தைச் சேர்ந்த மேற்கண்ட, 15 மாணவர்களும், 12 தங்கம், 8 வெள்ளி பதக்கங்களை கைப்பற்றினர். </p><p>பதக்கங்களுடன் நாடு திரும்பிய மாணவர்களுக்கு, கும்மிடிப்பூண்டியில் உற்சாக வரவேற்பு அளிக்கப்பட்டது. </p><p>பகுதி மக்கள் சார்பில், சாதனை படைத்த மாணவர்களுக்கு மாலைகள் மற்றும் சால்வைகள் அணிவிக்கப்பட்டது. </p><p>அதனை தொடர்ந்து பட்டாசுகள் வெடித்து, பேண்டு வாத்தியங்கள் முழங்க, கும்மிடிப்பூண்டி பஜார் பகுதி வழியாக ஊர்வலமாக அழைத்து செல்லப்பட்டனர்.</p><p><br></p>