கனிம வளங்கள் மீதான மாநில அரசுகளின் வரிவிதிப்பு அதிகாரத்தைப் பறிக்கும் எம்.எம்.டி.ஆர் சட்டத்தை உடனடியாகத் திரும்பப் பெறுக! சம்யுக்த கிசான் மோர்ச்சா கோரிக்கை

<p>கனிம வளங்கள் மீதான மாநில அரசுகளின் வரிவிதிப்பு அதிகாரத்தைப் பறிக்கும் எம்.எம்.டி.ஆர் சட்டத்தை உடனடியாகத் திரும்பப் பெறுக! சம்யுக்த கிசான் மோர்ச்சா கோரிக்கை</p><p>கனிம வளங்கள் மீதான மாநில அரசுகளின் வரிவிதிப்பு அதிகாரத்தை முற்றிலுமாகப் பறிக்கும் வகையிலும், கார்ப்பரேட் நிறுவனங்களுக்கு ஆதரவாகவும் கொண்டுவரப்பட்டுள்ள சுரங்கங்கள் மற்றும் கனிமங்கள் திருத்தச் சட்டம் (எம் எம் டி ஆர் ) 2026-ஐ உடனடியாகத் திரும்பப் பெற வேண்டும் என சம்யுக்த கிசான் மோர்ச்சா வலியுறுத்தியுள்ளது. மாநிலங்களின் கூட்டாட்சி உரிமைகளைக் காலில் போட்டு மிதிக்கும் இந்தச் சட்டத்தை எதிர்த்து மாநில அரசுகள் குரல்கொடுக்க வேண்டும் என்றும், கனிம வள வருவாயை விவசாய வளர்ச்சிக்கும் பழங்குடியினர் நலனுக்கும் பயன்படுத்த வேண்டும் என்றும் சம்யுக்த கிசான் மோர்ச்சா கேட்டுக்கொண்டுள்ளது.</p><p><br></p><p><strong>சட்டம் நிறைவேற்றப்பட்ட விதமும் கார்ப்பரேட் சார்பும்</strong></p><p>கடந்த ஆகஸ்ட் 10-ஆம் நாள் மக்களவையில் அறிமுகப்படுத்தப்பட்டு, எந்தவித முறையான விவாதமும் இன்றி ஆகஸ்ட் 13-ஆம் தேதி நாடாளுமன்றத்தின் இரு அவைகளிலும் நிறைவேற்றப்பட்ட இந்தச் சட்டம், ஆகஸ்ட் 17-ஆம் தேதி அரசிதழில் வெளியிடப்பட்டது. ஒடிசாவைச் சேர்ந்த பழங்குடியினத் தலைவரான ஜனாதிபதி திரௌபதி முர்மு, எந்தவிதத் தயக்கமுமின்றி வெறும் மூன்று நாட்களுக்குள் இந்தச் சட்டத்திற்கு ஒப்புதல் அளித்துள்ளமை, நவகாலகட்ட கார்ப்பரேட் வர்க்கத்தின் நலன்களுக்கே மோடி அரசு முன்னுரிமை அளிப்பதைக் காட்டுவதாக சம்யுக்த கிசான் மோர்ச்சா சுட்டிக்காட்டியுள்ளது. எனவே, ஜனாதிபதி உடனடியாக இந்த ஒப்புதலைத் திரும்பப் பெற்று, நாடாளுமன்ற மறுபரிசீலனைக்கு மசோதாவை அனுப்ப வேண்டும் என சம்யுக்த கிசான் மோர்ச்சா வேண்டுகோள் விடுத்துள்ளது.</p><p><br></p><p><strong>மாநிலங்களின் கூட்டாட்சி உரிமைகள் பறிப்பு</strong></p><p>இந்திய அரசியலமைப்புச் சட்டத்தின் 7-வது அட்டவணை மாநிலங்களுக்கு நிலம் மற்றும் கனிமங்கள் மீது வரி விதிக்க முழுமையான அதிகாரம் வழங்கி உள்ள நிலையில், புதிய எம்.எம்.டி.ஆர் சட்டத்தின் பிரிவு 9D இந்த அதிகாரத்தை அப்பட்டமாகப் பறிக்கிறது. ஏற்கனவே ஜி.எஸ்.டி சட்டம் மூலம் மாநிலங்களின் வரிவிதிப்பு உரிமைகளைப் பறித்த மோடி அரசு, தற்போது கனிம வள வரியையும் தடுத்து மாநிலங்களை நிதி ரீதியாக முடக்கியுள்ளது. ஜூலை 2024-ல் உச்சநீதிமன்றம் வழங்கிய தீர்ப்பின்படி, 2005 முதல் நிலுவையில் உள்ள கனிம வள வரி நிலுவைத் தொகையை மாநிலங்கள் வசூலிக்கலாம் என்றிருந்த உரிமையை இந்தச் சட்டம் செல்லாததாக்கியுள்ளது.</p><p><br></p><p><strong>பெருநிறுவனங்களுக்குச் சாதகமான பல்லாயிரக்கணக்கான கோடி இழப்பு</strong></p><p>இதன் மூலம் அதானி உள்ளிட்ட சுரங்க கார்ப்பரேட் பெருநிறுவனங்களுக்குச் சாதகமாக 2,65,000 கோடி ரூபாய் தள்ளுபடி செய்யப்பட்டுள்ளது. குறிப்பாக ஜார்க்கண்ட் மாநிலத்திற்கு வரவிருந்த 1,36,000 கோடி ரூபாயும், ஒடிசா மாநிலத்திற்கு வரவிருந்த 1,00,000 கோடி ரூபாயும் பெருமளவில் இழப்பாக ஏற்பட்டுள்ளது. இது வெளிப்படையான அரசியல் ஊழலாகும். மேலும், அரிய கனிமங்கள் மற்றும் பாதுகாப்புத் துறைக்குத் தேவையான வளங்களை வெளிநாட்டு நிறுவனங்களுக்குத் தாரைவார்க்கும் மோடி அரசின் இந்த நடவடிக்கை நாட்டின் தேசிய பாதுகாப்புக்கும் தற்சார்புக்கும் பெரும் அச்சுறுத்தலாகும் என சம்யுக்த கிசான் மோர்ச்சா எச்சரித்துள்ளது. இந்தச் சட்டத்திற்கு எதிராக அனைத்துக் கட்சிகளும், விவசாயிகளும், பழங்குடியின மக்களும் ஒன்றிணைந்து தீவிரப் போராட்டங்களை முன்னெடுக்க வேண்டும் என சம்யுக்த கிசான் மோர்ச்சா அறைகூவல் விடுத்துள்ளது.</p><p><br></p>