சென்னை விரைவு செய்திகள்

<p><strong>தமிழக மாணவர்களுக்கு ரஷ்யாவில் மருத்துவம் படிக்க அரிய வாய்ப்பு சென்னையில் கல்வி கண்காட்சி</strong> </p><p>சென்னை, மே 7- சென்னையில் இந்த வார இறுதியில் நடைபெறவுள்ள ‘அனைத்திந்திய ரஷ்யக் கல்வி கண்காட்சி 2026-27’ மூலம் ரஷ்யாவின் 600-க்கும் மேற்பட்ட அரசு பல்கலைக்கழகங்களில் பயில தமிழக மாணவர்கள் விண்ணப்பிக்கலாம். இக்கண்காட்சியில் பங்கேற்கும் 8 முன்னணி கல்வி நிறுவனங்கள் மூலம் மருத்துவம், பயோ-டெக்னாலஜி மற்றும் செயற்கை நுண்ணறிவு போன்ற படிப்புகளுக்கு நேரடிச் சேர்க்கை வழங்கப்பட உள்ளது. இவ்வாண்டு மொத்தம் 10,000 மருத்துவ இடங்கள் ஒதுக்கப்பட்டுள்ள நிலையில், தகுதியுள்ள 200 மாணவர்களுக்கு 100% கல்வி உதவித்தொகையும் வழங்கப்பட உள்ளது. இது குறித்து ரஷ்யத் தூதரக அதிகாரி வலெரி கோட்ஜயேவ் கூறுகையில், நீட் தேர்வில் தகுதி பெற்ற மாணவர்கள் எவ்வித கூடுதல் நுழைவுத் தேர்வுகளும் இன்றி ரஷ்யாவில் சேரலாம் என்றும், தமிழ் வழியில் பயின்ற மாணவர்களும் இதற்கு விண்ணப்பிக்கலாம் என்றும் தெரிவித்தார். ஆண்டுக்குக் குறைந்தபட்சம் 3.5 லட்சம் ரூபாய் கட்டணத்தில் உலகத்தரம் வாய்ந்த கல்வியைப் பெற முடியும். இந்த கண்காட்சியானது சென்னையில் மே9,10 நடைபெறுகிறது. இதனை தொடர்ந்து மதுரை (மே 12), திருச்சி (மே 13), சேலம் (மே 14) மற்றும் கோயம்புத்தூர் (மே 15) ஆகிய நகரங்களில் நடைபெற உள்ளது. அனுமதி இலவசம். மேலதிக விவரங்களுக்கு 92822 21221 என்ற எண்ணைத் தொடர்பு கொள்ளலாம்.</p><p><strong>எம்-ஆதார் செயலி புதிய சாதனை 2 கோடிக்கும் மேற்பட்டோர் பதிவிறக்கம்</strong> </p><p>சென்னை, மே 7- இந்திய தனித்துவ அடையாள ஆணையத்தின் அதிகாரப்பூர்வ மொபைல் செயலியான ‘எம்-ஆதார்’ , 2 கோடிக்கும் அதிகமான பதிவிறக்கங்களைக் கடந்து புதிய சாதனை படைத்துள்ளது. ஆண்ட்ராய்டு மற்றும் ஐஓஎஸ் தளங்களில் கிடைப்பதாக இந்தச் செயலி, பொதுமக்கள் தங்கள் ஆதார் அட்டையைக் காகித வடிவில் எடுத்துச் செல்வதைத் தவிர்த்து, ஸ்மார்ட்போனிலேயே டிஜிட்டல் முறையில் பராமரிக்க வழிவகை செய்கிறது. பயனர்களின் வசதிக்கேற்ப தொடர்ந்து மேம்படுத்தப்பட்டு வரும் இந்தச் செயலியின் எளிமையான பயன்பாட்டு முறையே இந்த வெற்றிக்குக் காரணம் என அதிகாரிகள் தெரிவித்துள்ளனர். இந்தச் செயலி மூலம் முகவரியைப் புதுப்பித்தல், இ-ஆதார் பதிவிறக்கம் உள்ளிட்ட 35-க்கும் மேற்பட்ட சேவைகளை வீட்டிலிருந்தே பெற முடியும். குறிப்பாக, ஒரே செயலியில் குடும்பத்தைச் சேர்ந்த ஐந்து உறுப்பினர்களின் விவரங்களைச் சேமிக்கும் ‘ஃபேமிலி புரொபைல்’ வசதி மற்றும் பாதுகாப்பை உறுதி செய்யும் ‘பயோமெட்ரிக் லாக்’, ‘டிவைஸ் பைண்டிங்’ போன்ற நவீன அம்சங்கள் இதில் இடம்பெற்றுள்ளன. ரயில் மற்றும் விமான நிலையங்களில் இந்த டிஜிட்டல் ஆதார் அங்கீகரிக்கப்பட்ட சான்றாக ஏற்றுக்கொள்ளப்பட்டாலும், மிக முக்கியமான சரிபார்ப்புகளின் போது அசல் அட்டையை உடன் வைத்திருப்பது நல்லது என அறிவுறுத்தப்பட்டுள்ளது.<strong> </strong></p><p><strong>உலக யோகாசன சாம்பியன்ஷிப் </strong></p><p>சென்னை, மே 7- இந்தியாவின் மிகத்தொன்மையான யோகா இப்போது உலக அரங்கில் ஒரு நவீனப் போட்டி விளையாட்டாக உருவெடுத்துள்ளது. இதன் முக்கிய மைல்கல்லாக, முதலாவது ‘உலக யோகாசன சாம்பியன்ஷிப்’ போட்டிகள் வரும் ஜூன் 4-ஆம் தேதி முதல் 8-ஆம் தேதி வரை குஜராத் மாநிலம் அகமதாபாத்தில் நடைபெற உள்ளன. ‘உலக யோகாசன’ அமைப்பின் வழிகாட்டுதலின்படி, இந்த போட்டி நடைபெறவுள்ளது. இந்த உலகளாவிய திருவிழாவில் 40-க்கும் மேற்பட்ட நாடுகளைச் சேர்ந்த தலைசிறந்த வீரர்கள் பங்கேற்றுத் தங்கள் திறமைகளை வெளிப்படுத்த உள்ளனர். இந்திய தேசிய அணிக்கான வீரர்கள் தேர்வுகள் மே 1 மற்றும் 2 ஆகிய தேதிகளில் ஹரியானா மாநிலம் சோனிபட்டில் உள்ள இந்திய விளையாட்டு ஆணைய மையத்தில் வெற்றிகரமாக நடத்தி முடிக்கப்பட்டன. யோகாசனத்தை ஒரு சர்வதேசப் போட்டி விளை யாட்டாக நிலைநிறுத்துவதும், வருங்காலத்தில் இதனை ஒலிம்பிக் போட்டிகளில் ஒரு அங்கமாக மாற்றுவதுமே இந்தத் தொடரின் முதன்மை நோக்கமாகும். இந்த ஜூன் மாதம், அகமதாபாத் நகரம் இந்தியாவின் யோகப் பாரம்பரியத்தையும் விளையாட்டுத் திறனையும் பறை சாற்றும் ஒரு வரலாற்றுச் சிறப்புமிக்க களமாக மாறப்போகிறது. </p><p><strong>மெட்ரோ ரயில் நிலையங்களில் 20 புதிய வாகன நிறுத்துமிடங்கள் திறப்பு </strong></p><p>சென்னை, மே 7- சென்னையின் போக்குவரத்து நெரிசலைக் குறைக்க அதிவேகமாக நடைபெற்று வரும் மெட்ரோ ரயில் இரண்டாம் கட்டத் திட்டத்தில், வடபழனி மற்றும் திருமங்கலம் ஆகிய பகுதிகளில் பணிகள் தற்காலிகமாகத் தாமதமடைந்துள்ளன. இந்த இடங்களுக்கான மேம்பாட்டுப் பணிகளில் கட்டுமான நிறுவனங்கள், மெட்ரோ நிர்வாகம் நிர்ணயித்த மதிப்பீட்டை விட மிக அதிகமான விலையைக் கோரியதே இதற்குக் காரணமாகும். கட்டுமானப் பொருட்களின் விலை உயர்வு மற்றும் இடநெரிசலால் ஏற்பட்டுள்ள இந்த நிதிச் சிக்கலைத் தீர்க்க, மறு-ஒப்பந்தம் கோருவது அல்லது விலையைக் குறைக்க நிறுவனங்களுடன் பேச்சுவார்த்தை நடத்துவது போன்ற உத்திகளை மெட்ரோ நிர்வாகம் கையாண்டு வருகிறது. இதற்கிடையில், புறநகர் ரயில் பயணிகளின் நீண்டகாலத் தேவையைக் கருத்தில் கொண்டு, தெற்கு ரயில்வே சென்னை மண்டலத்தில் உள்ள 20 ரயில் நிலையங்களில் புதிய வாகன நிறுத்துமிட வசதிகளைப் பயன்பாட்டிற்குக் கொண்டு வந்துள்ளது. திருவொற்றியூர், தாம்பரம், செங்கல்பட்டு மற்றும் ஆவடி உள்ளிட்ட முக்கிய வழித்தடங்களில் உள்ள காலி ரயில்வே நிலங்களில் இந்த வசதிகள் ஏற்படுத்தப்பட்டுள்ளன. சிசிடிவி கண்காணிப்பு மற்றும் டிஜிட்டல் கட்டண வசதியுடன் கூடிய இந்த நிறுத்துமிடங்கள், வாகனங்களின் பாதுகாப்பை உறுதி செய்வதுடன், பயணிகளின் நேரத்தையும் மிச்சப்படுத்தும். இத்திட்டத்தின் மூலம் ரயில்வேக்குக் கூடுதல் வருவாய் கிடைக்கும்.</p>