ரெப்போ வட்டி விகிதத்தில் மாற்றமில்லை!

<p>ரெப்போ வட்டி விகிதம் எந்த மாற்றமுமின்றி 5.25% ஆக தொடரும் என்று இந்திய ரிசர்வ் வங்கி ஆளுநர் சஞ்சய் மல்ஹோத்ரா அறிவித்துள்ளார்.</p><p>இந்திய ரிசர்வ் வங்கி ஆளுநர் சஞ்சய் மல்ஹோத்ரா தலைமையில் நிதிக் கொள்கைக் குழு கூட்டம் கடந்த ஏப்ரல் 6-ஆம் தேதி தொடங்கியது. இக்கூட்டத்தின் இறுதி நாளான இன்று, ரெப்போ வட்டி விகிதத்தை மாற்றமின்றி தொடர ஒருமனதாக முடிவெடுக்கப்பட்டது.</p><p>அதன்படி, வங்கிகளுக்கான குறுகிய கால கடனுக்கான ரெப்போ வட்டி விகிதம் எந்த மாற்றமும் இன்றி 5.25% ஆக தொடரும் என்று ரிசர்வ் வங்கி ஆளுநர் சஞ்சய் மல்ஹோத்ரா அறிவித்துள்ளார்.</p><p>இதன்மூலம், வீடு, வாகனம், தனிநபர் கடன் உள்ளிட்ட கடன்களுக்கான வட்டி விகிதத்தில் மாற்றமில்லை. வங்கிகளில் நிரந்தர வைப்பு, தொடர் வைப்பு உள்ளிட்ட சேமிப்புத் திட்டங்களுக்கு, வங்கிகள் அளிக்கும் வட்டியும் குறையாமல் அதே விகிதத்தில் தொடர்கிறது.</p><p>2026-27 நிதியாண்டுக்கான நுகர்வோர் விலை குறியீட்டு (CPI) பணவீக்கம் 4.6% ஆக இருக்கும்; இது, முதல் காலாண்டில் 4.0% ஆகவும், இரண்டாம் காலாண்டில் 4.4% ஆகவும், மூன்றாம் காலாண்டில் 5.2% ஆகவும், நான்காம் காலாண்டில் 4.7% ஆக குறையும் என்றும் ரிசர்வ் வங்கி கணித்துள்ளது.</p><p>2026-27 நிதியாண்டுக்கான பொருளாதார வளர்ச்சி 6.9% ஆக குறையும்; இதுவே, முதல் காலாண்டில் 6.8% ஆகவும், இரண்டாம் காலாண்டில் 6.7% ஆகவும், மூன்றாம் காலாண்டில் 7% ஆகவும், நான்காம் காலாண்டில் 7.2% ஆகவும் இருக்கும் என்று ரிசர்வ் வங்கி கணித்துள்ளது.</p><p><br></p>