போலீசாரை ஏமாற்றி 2-ஆவது முறையாக தப்பிய கைதி: கோவை மத்திய சிறை வளாகத்தில் பரபரப்பு!

<p>கோவை மத்திய சிறையில் அடைக்க அழைத்து வந்த கைதி ராகவன் என்பவர் தப்பி ஓடிய சம்பவம் பரபரப்பை ஏற்படுத்தியுள்ளது.</p><p>ஈரோடு மாவட்டம் பவானியைச் சேர்ந்தவர் ராகவன் (25). இவர் மீது தமிழ்நாடு மற்றும் பெங்களூரில் பல்வேறு வழிப்பறி வழக்குகள் நிலுவையில் உள்ளன.</p><p>கடந்த ஜூன் மாதம் பெங்களூர் போலீசார் ராகவனைக் கோவையில் கைது செய்து அழைத்துச் சென்றபோது, கருமத்தம்பட்டி பகுதியில் அவரிடமிருந்து தப்பியோடினார். இது தொடர்பாக அன்னூர் காவல் நிலையத்தில் வழக்குப்பதிவு செய்யப்பட்டுத் தேடப்பட்டு வந்த ராகவனை, நேற்று போலீசார் மீண்டும் கைது செய்தனர்.</p><p>கைது செய்யப்பட்ட அவரை நீதிமன்றத்தில் ஆஜர்படுத்திய பின், கோவை மத்திய சிறையில் அடைப்பதற்காக போலீசார் அழைத்து வந்தனர். சிறையின் முதல் நுழைவாயிலைக் கடந்து, மெயின் நுழைவாயிலில் சோதனைக்காகக் காத்திருந்தபோது, ராகவன் திடீரென போலீசாரை ஏமாற்றிவிட்டு மீண்டும் தப்பியோடினார்.</p><p>சிறை வளாகம் முழுவதும் தீவிரமாகத் தேடியும் இரவு வரை அவர் சிக்காததால், ரேஸ்கோர்ஸ் காவல்நிலையத்தில் புகாரளிக்கப்பட்டது. தப்பியோடிய கைதியை போலீசார் தீவிரமாகத் தேடி வருகின்றனர்.</p><p>சமீபத்தில் தேனி மாவட்டத்தில் 17 சிறைக் கைதிகள் தப்பிய சம்பவம் பெரும் அதிர்ச்சியை ஏற்படுத்திய நிலையில், தற்போது கோவை மத்திய சிறை வளாகத்திலேயே கைதி ஒருவர் தப்பியோடிய சம்பவம் பாதுகாப்பு குறித்த கேள்விகளை எழுப்பியதுடன் பெரும் பரபரப்பையும் ஏற்படுத்தியுள்ளது.</p>