மதவெறி அரசியலை வீழ்த்தச் சட்டமன்றக் களத்தில் நிற்கிறேன்: தொல். திருமாவளவன்

<p><strong>மதவெறி அரசியலை வீழ்த்தச் சட்டமன்றக் களத்தில் நிற்கிறேன்: தொல். திருமாவளவன்</strong></p><p>தமிழக அரசியல் களம் 2026 சட்டமன்றத் தேர்தலை நோக்கி அனல் பறக்கத் தொடங்கியுள்ள சூழலில், விடுதலைச் சிறுத்தைகள் கட்சித் தலைவர் தொல். திருமாவளவன் தேர்தல் களத்தில் நிற்கிறார். காட்டு மன்னார் கோயில் தொகுதியில் போட்டியிடும் அவர், &#39;தி இந்து&#39; (ஆங்கிலம்) நாளிதழுக்கு அளித்துள்ள நேர்காணலில், தமிழகத்தில் மதவெறி அரசியலை வீழ்த்தி, ஒரு புதிய அரசியல் மாற்றத்தை ஏற்படுத்தத் தனது முதன்மையான இலக்கு என்பதைத் தெரிவித்துள்ளார்.</p><p><strong>மதவெறிக்கு எதிரான சமரசமற்ற போர்!</strong></p><p>இந்தியத் துணைக்கண்டத்தின் பன்முகத்தன்மையைக் சிதைக்கத் துடிக்கும் சனாதன மற்றும் மதவெறிச் சக்திகள், தற்போது தமிழகத்தைத் தங்களின் அடுத்த இலக்காகக் கொண்டுள்ளன. இதனை முறியடிக்க வேண்டிய வரலாற்றுத் தேவை தற்போது எழுந்துள்ளதாகத் திருமாவளவன் குறிப்பிட்டுள்ளார்.</p><p>&quot;நாடாளுமன்றத்திற்குச் செல்வது என்பது ஒரு கௌரவம். ஆனால், தமிழக அரசியலில் பாஜகவின் ஊடுருவல் என்பது மிகுந்த கவலைக்குரிய ஒன்றாக மாறியுள்ளது. அவர்களின் பிளவுவாத அரசியலைத் தடுத்து நிறுத்த வேண்டியது அவசியம். ஒரு பொதுவான அரசியல் மாற்றத்தை ஏற்படுத்தித் தங்களை நிலைநிறுத்தத் திட்டமிடுகின்றனர். இந்தச் சூழலில், ஒரு பொறுப்புள்ள அரசியல் தலைவராக நான் சட்டமன்றத்தில் இருந்து கொண்டு அந்தச் சக்திகளை நேரடியாக எதிர்கொள்ளத் தயாராக இருக்கிறேன்&quot; என்று அவர் தனது முடிவுக்கான காரணத்தை விளக்கியுள்ளார்.</p><p><strong>மாநில உரிமைகளும் ஜனநாயக ஆட்சியும்!</strong></p><p>ஒன்றிய பாஜக அரசு மாநிலக் கட்சிகளைப் பலவீனப்படுத்தி, கூட்டாட்சித் தத்துவத்தைச் சிதைக்க முயல்வதாக விசிக தலைவர் கடுமையாகச் சாடியுள்ளார். &quot;பாஜகவின் வியூகம் என்பது மாநில சுயாட்சியை ஒழிப்பதுதான். அதிகாரத்தை ஓரிடத்தில் குவிப்பதுதான். தேர்தல் முடிவுகளுக்குப் பிறகு அவர்கள் பல மாநிலங்களில் செய்தது போல, குதிரை பேரம் மற்றும் அதிகார துஷ்பிரயோகத்தின் மூலம் மக்கள் தீர்ப்பைச் சிதைக்க முயல்வார்கள்.</p><p>இத்தகைய நெருக்கடியான கட்டத்தில், தமிழகத்தின் உரிமைகளுக்காகவும், சமூக நீதி அரசியல் பண்புகளைப் பாதுகாக்கவும் சட்டமன்றத்தில் வலுவான ஜனநாயகக் குரல் ஒலிக்க வேண்டும். அந்தத் தேவையை நிறைவு செய்யவே நான் தேர்தல் களத்தில் நிற்கிறேன்&quot; என்றார்.</p><p><strong>கொள்கை சார்ந்த முடிவு</strong></p><p>திமுக தலைமையிலான கூட்டணியில் விசிக-விற்கு 8 இடங்கள் ஒதுக்கப்பட்டது குறித்துப் பேசிய அவர், அது வெறும் எண்ணிக்கை சார்ந்த முடிவு அல்ல, கொள்கை சார்ந்தது என்பதைச் சுட்டிக்காட்டினார். &quot;நாங்கள் 10 இடங்களுக்கு மேல் எதிர்பார்த்தோம் என்பது உண்மைதான். ஆனால், கூட்டணியில் பல சிறிய கட்சிகள் இணைந்திருப்பதாலும், அனைவரையும் அரவணைத்துச் செல்ல வேண்டிய கடமையும் திமுகவிற்கு இருப்பதாலும், ஒரு போக்கு சக்திகளின் ஒற்றுமை கருதி நாங்கள் 8 இடங்களை ஏற்றுக்கொண்டோம்&quot; என்று குறிப்பிட்டார்.</p><p><strong>விஜய் மற்றும் பொற்கொடி குறித்த நிலைப்பாடு</strong></p><p>நடிகர் விஜய்யின் தமிழக வெற்றிக் கழகம் குறித்துப் பேசிய அவர், பாஜகவுடன் அவர்கள் கைகோர்க்காதது ஒரு நல்ல அறிகுறி என்றாலும், அவர்கள் பாஜகவின் கொள்கைகளைத் தங்களின் மேடைகளில் ஏன் விமர்சிப்பதில்லை என்ற கேள்வியை எழுப்பினார்.</p><p>அதேபோல், மறைந்த பி.எஸ்.பி தலைவர் ஆம்ஸ்ட்ராங்கின் மனைவி பொற்கொடி அதிமுக சார்பில் போட்டியிடுவது குறித்து, &quot;ஒரு பெண்ணாகவும், பாதிக்கப்பட்ட குடும்பத்தைச் சேர்ந்தவராகவும் அவருக்குச் சமூகத்தில் பாதுகாப்புத் தேவை; அதனை அதிமுக வழங்கியிருப்பதை நாங்கள் மனிதநேய அடிப்படையில் வரவேற்கிறோம்&quot; எனத் தெரிவித்தார்.</p>