மாஞ்சோலை, நாலுமுக்கு, ஊத்து பகுதிகளில் கனமழை அணைகளுக்கு நீர்வரத்து அதிகரிப்பு

<p><strong>மாஞ்சோலை, நாலுமுக்கு, ஊத்து பகுதிகளில் கனமழை அணைகளுக்கு நீர்வரத்து அதிகரிப்பு</strong></p><p>திருநெல்வேலி, ஜூன் 5- நெல்லை மாவட்டத்தின் மேற்கு தொடர்ச்சி மலைப் பகுதிகளில் பெய்து வரும் மழையால் மாவட்ட அணைகளுக்கு நீர்வரத்து அதிகரித்துள்ளது. குறிப்பாக மாஞ்சோலை, காக்காச்சி, நாலுமுக்கு மற்றும் ஊத்து பகுதிகளில் கனமழை பதிவாகியுள்ளது. </p><p>பாபநாசம் அணையில் 58.80 அடி நீர் இருப்பு உள்ளது. அணைக்கு வினாடிக்கு 5,140.97 கனஅடி நீர் வரத்து பதிவாகியுள்ள நிலையில், 204.50 கனஅடி நீர் வெளியேற்றப்படுகிறது. </p><p>சேர்வலாறு அணையில் 76.77 அடி நீர் இருப்பு உள்ளது. அணைக்கு நீர்வரத்தும், வெளியேற்றமும் இல்லை. மணிமுத்தாறு அணையில் தற்போது 67.73 அடி நீர் இருப்பு காணப்படுகிறது. அணைக்கு வினாடிக்கு 803.33 கனஅடி நீர் வரத்து உள்ளது.</p><p>வடக்கு பச்சையாறு அணையில் 50 அடியில் 6 அடி நீரும், நம்பியாறு அணையில் 22.96 அடியில் 14 அடி நீரும் இருப்பில் உள்ளது. கொடுமுடியாறு அணையில் 52.50 அடியில் 7 அடி நீர் இருப்பு காணப்படுகிறது. அணைக்கு வினாடிக்கு 43 கனஅடி நீர் வரத்து உள்ள நிலையில், 2 கனஅடி நீர் வெளியேற்றப்படுகிறது. </p><p>இதனிடையே மாவட்டத்தின் மலைப்பகுதிகளில் பரவலாக மழை பெய்துள்ளது. அதிகபட்சமாக நாலுமுக்கில் 165 மில்லி மீட்டரும், ஊத்தில் 153 மில்லி மீட்டரும், காக்காச்சியில் 120 மில்லி மீட்டரும், மாஞ்சோலையில் 97 மில்லி மீட்டரும் மழை பதிவாகியுள்ளது. </p><p>மேலும் சேர்வலாற்றில் 26 மி.மீ., கொடுமுடியாற்றில் 24 மி.மீ., பாபநாசத்தில் 22 மி.மீ., மணிமுத்தாற்றில் 14.2 மி.மீ., கன்னடியானில் 11.80 மி.மீ., அம்பாசமுத்திரத்தில் 9 மி.மீ., ராதாபுரத்தில் 6 மி.மீ., சேரன்மகாதேவியில் 4.60 மி.மீ., பாளையங்கோட்டையில் 3.20 மி.மீ. மற்றும் களக்காட்டில் 1.20 மி.மீ. மழை பதிவாகியுள்ளது. மேற்கு தொடர்ச்சி மலைப்பகுதிகளில் தொடர்ந்து பெய்து வரும் மழையால் அணைகளின் நீர்மட்டம் படிப்படியாக உயர்ந்து வருவதாக பொதுப்பணித்துறை அதிகாரிகள் தெரிவித்துள்ளனர்.</p>