விளையாட்டு

<p><strong>அமெரிக்காவின் சட்டப்படி டிக்கெட்டுகளை அதிக விலைக்கு மறுவிற்பனை செய்ய அனுமதி உண்டாம்! பிபா தலைவர் ஜியானி இன்பான்டினோ உளறல்</strong></p><p>இந்த ஆண்டு ஜூன் மாதம் 23ஆவது சீசன் உலகக் கோப்பை கால்பந்து தொடர் அமெரிக்கா, மெக்சிகோ, கனடா நாட்டில் கூட்டாக தொடங்குகிறது.</p><p> இந்த தொடருக்கான டிக்கெட் விலைகள் விண்ணைத் தொடும் அளவிற்கு உயர்ந்துள்ளதற்கு ரசிகர்கள் கடும் கண்டனம் தெரிவித்து வருகின்றனர். </p><p>இதில் இறுதிப்போட்டிக்கான டிக்கெட் விலை வரலாற்றிலேயே இல்லாத வகையில் இந்திய மதிப்பில் ரூ.18 கோடிக்கு மேல் (ஒரு சில கேலரி மட்டும்) விற்பனை செய்யப்பட்டு வருவதாக செய்திகள் வெளியாகியுள்ளன.</p><p> இது பெரும் சர்ச்சையை ஏற்படுத்தியுள்ளது.</p><p> இந்த அடாவடி டிக்கெட் வசூலுக்கு ஐரோப்பிய கால்பந்து ரசிகர்கள் அமைப்பு, டிக்கெட் விலையேற்றத்தை மிரட்டிப் பணம் பறிக்கும் செயல் ; மிகப்பெரிய துரோகம் என்று வர்ணித்து கடும் கண்டனம் தெரிவித்துள்ளன.</p><p> இதுதொடர்பாக ஐரோப்பிய ஆணையத்தில் வழக்கும் தொடரப்பட்டுள்ளதாகவும் செய்திகள் வெளியாகியுள்ளன. </p><p> இந்நிலையில், டிக்கெட் விற்பனைக்கு கண்டனம், விமர்சனங்கள் எழுந்து வருவதால், சர்வதேச கால்பந்து சம்மேளன தலைவர் ஜியானி இன்பான்டினோ புதனன்று மழுப்பலாக விளக்கம் அளித்துள்ளார். </p><p>அதில்,”யாராவது இறுதிப் போட்டி டிக்கெட்டை 2 மில்லியன் டாலருக்கு (ரூ.18 கோடிக்கு மேல்) விற்றால், அதன் அசல் விலை அது என்று அர்த்தமல்ல. அதேபோல் யாராவது அந்த விலைக்கு வாங்குவார்கள் என்றும் அர்த்தமல்ல. </p><p>யாராவது அவ்வளவு விலைக்கு டிக்கெட் வாங்கினால், அவருக்கு நானே நேரில் சென்று ஹாட் டாக், கோக் வழங்கி உபசரிப்பேன். நாங்கள் உலகின் மிக வளர்ந்த பொழுதுபோக்குச் சந்தையில் (அமெரிக்கா) இருக்கிறோம். </p><p>எனவே சந்தை விலையையே நாங்கள் பயன்படுத்த வேண்டும். </p><p>அமெரிக்காவின் சட்டப்படி டிக்கெட்டுகளை அதிக விலைக்கு மறுவிற்பனை செய்ய அனுமதி உண்டு” என எதுவும் புரிதல் இல்லாமல் பேசினார். </p><p>2022ஆம் ஆண்டு நடைபெற்ற 22ஆவது சீசன் உலகக்கோப்பையில் இறுதிப்போட்டி டிக்கெட்டின் அதிகபட்ச அசல் விலை சுமார் 1,600 டாலர் (1,50,620) ஆகும். </p><p>ஆனால் 2026 உலகக்கோப்பையில் இது சுமார் 11,000 டாலர் (சுமார் ரூ.10,00,00) ஆக உயர்த்தப்பட்டுள்ளது. </p><p>இது அசல் விலை தான். ஆனால் ரசிகர்கள் எதிர்பார்ப்பு, டிக்கெட் விற்பனை ஆர்வத்தால் தற்போது இறுதிப்போட்டிக்கான டிக்கெட் விலை 2 மில்லியன் டாலருக்கு (ரூ.18 கோடிக்கு மேல்) விற்கப்பட்டு வருகிறது. </p><p>இதனால் தான் ரசிகர்கள் கண்டனம் தெரிவித்து வருகின்றனர். </p><p>ஆனால் அமெரிக்க ஜனாதிபதி டிரம்ப் போல, சர்வதேச கால்பந்து சம்மேளன தலைவர் ஜியானி இன்பான்டினோ விளக்கம் என்ற பெயரில் உளறிக்கொட்டி வருகிறார். </p><p>அமெரிக்காவின் நியூயார்க் நகரில் ஜூலை 19 அன்று இறுதிப்போட்டி நடைபெறவுள்ளது என்பது குறிப்பிடத்தக்கது.</p><p><strong>ஐபிஎல் : இன்றைய ஆட்டம்</strong></p><p>தில்லி - கொல்கத்தா</p><p>இடம் : தில்லி மைதானம் / நேரம் : இரவு 7:30 மணி</p><p>சேனல் : ஸ்டார் ஸ்போர்ட்ஸ், ஜியோ ஸ்டார் (ஓடிடி)</p>