அப்பாதான் நான்..! தந்தையர் தினம் ஜூன் 21 - காயத்ரி மாணிக்கம்

<p><strong>அப்பாதான் நான்..! தந்தையர் தினம் ஜூன் 21 - காயத்ரி மாணிக்கம்</strong></p><p>தூரத்தில் இருப்பார் அப்பா புரியாத புதிரில் அவர் மௌனம் நான் புரிந்த வயதிலிருந்து ஏதோ அறியாத வெறுப்பில் விலகித்தான் நிற்பேன்...</p><p>தள்ளியிருந்து தேவைக்கு தலைகவிழ்ந்து பேசுவேன் ஒருநாளும் அவருடன் விரும்பி எங்கேயும் பயணம் சென்றதில்லை...</p><p>மார்க் அட்டை கையெழுத்து அம்மா மூலமாக வாங்கி கல்லூரி பேரன்ஸ் மீட்டிங்கில் அப்பாவை யாரிடமும் அறிமுகமாக்கியதில்லை...</p><p>ஆனாலும் நண்பர்கள் வழியசென்று பேசும்போதெல்லாம் சாடையில் பார்க்கும் அப்பா புன்முறுவலை என்னில் அழுத்தி வைக்க தவறமாட்டார்...</p><p>எனது வாழ்க்கையில் ஒருமுறை மருத்துவமனை அப்பாக்கான வைத்தியத்திலும் பாகுபாடற்ற அன்னியத்தியே உறுதிபடுத்தி காட்டினேன்...</p><p>ஒருநாள் அப்பாவை எடுத்ததுக்கொண்டது காலம் வாசல் நின்று வருத்தமுடன் வந்தவர்களுக்கெல்லாம் துக்கம் சொன்னேன்...</p><p>அப்பாவின் நண்பர் என்னையே உற்று நோக்கி அப்பா மாதிரியே புன்முறுவலித்த போது உணர்வில் ஒன்று தோன்றியது....</p><p>‘அப்பன உரிச்சி வச்சுருக்கான்’ அப்பத்தா சொல்லியிருப்பாள் புரிதல் பக்குவத்தில் குளிர்ப்பெட்டி மேல் பூமாலை விலக்கி புன்முறுவலிக்கிறேன் அப்பாதான் நான்..!</p><p><strong>- காயத்ரி மாணிக்கம்</strong></p>