எகிப்து பாலைவனத்தின் அடியில் 7 கோடி ஆண்டுகளுக்கு முந்தைய 'சுறா உலகம்' கண்டுபிடிப்பு!

<p><strong>கெய்ரோ:</strong> எகிப்தின் வறண்ட பாலைவனப் பகுதியில், சுமார் <strong>7 கோடி ஆண்டுகளுக்கு முன்பு வெப்பமண்டல கடல் இருந்ததற்கான ஆதாரங்களை</strong> தொல்லியல் மற்றும் அறிவியல் ஆய்வாளர்கள் கண்டுபிடித்துள்ளனர்.</p><p>கெய்ரோ பல்கலைக்கழகத்தைச் சேர்ந்த ஆய்வாளர்கள், எகிப்தின் <strong>அபு-தார்தூர் பீடபூமியின்</strong> மேற்குப் பாலைவனப் பகுதியில் ஆய்வு மேற்கொண்டனர். அப்போது <strong>5 அழிந்துபோன சுறா இனங்களைச் சேர்ந்த 14 புதைபடிவப் பற்கள்</strong> கண்டெடுக்கப்பட்டன.</p><p>கண்டறியப்பட்ட சுறா இனங்களில் <strong>Serratolamna cf. serrata</strong> மற்றும் <strong>Squalicorax bassanii</strong> ஆகியவை இதற்கு முன்பு எகிப்தில் கண்டறியப்படாதவை. மேலும், ஊசி போன்ற கூர்மையான பற்களைக் கொண்ட <strong>Scapanorhynchus cf. raphiodon</strong> சுறா இனத்தின் புதைபடிவம் ஆப்பிரிக்காவில் இதற்கு முன்பு கண்டறியப்படாமல் இருந்திருக்கலாம் என ஆய்வாளர்கள் தெரிவித்துள்ளனர்.</p><p><img src="https://v3.magazineallyapi.theekkathir.in/images/2026/08/fcc0e6fc-5783-4100-838b-7eb4bbe64c27.jpg" /></p><p>இந்த சுறாக்களின் பற்கள் வெவ்வேறு வடிவங்களில் இருந்துள்ளன. சில ஊசி போன்றும், சில அகலமாகவும் ரம்பம் போன்ற விளிம்புகளுடனும் காணப்பட்டன. இதன் மூலம் வெவ்வேறு சுறா இனங்கள் வெவ்வேறு வகையான இரைகளை வேட்டையாடியிருக்கலாம் என ஆய்வாளர்கள் கருதுகின்றனர்.</p><p>சுறா புதைபடிவங்களுடன் <strong>சிறிய மீன்கள், முதுகெலும்பில்லா உயிரினங்கள் மற்றும் கடல்வாழ் ஊர்வனவற்றின் எச்சங்களும்</strong> கண்டெடுக்கப்பட்டுள்ளன. இவை அனைத்தும் அந்தப் பகுதி <strong>கிரிட்டேசியஸ் காலத்தின் பிற்பகுதியில் (14.5 கோடி முதல் 6.6 கோடி ஆண்டுகளுக்கு முன்பு) வளமான கடல் சூழலாக இருந்ததை</strong> சுட்டிக்காட்டுகின்றன.</p><p>அந்தக் காலத்தில் பூமி இன்றைவிட வெப்பமாகவும் ஈரப்பதமாகவும் இருந்ததாகவும், கடலின் ஆழத்திலிருந்து ஊட்டச்சத்துக்கள் மேலே கொண்டுவரப்பட்டதால் பிளாங்க்டன் உள்ளிட்ட நுண்ணுயிர்கள் பெருகி, அவற்றைச் சார்ந்த மிகப்பெரிய கடல்வாழ் உயிரினச் சங்கிலி உருவாகியிருந்ததாகவும் ஆய்வாளர்கள் தெரிவித்துள்ளனர்.</p><p><strong>தற்போது உலகின் மிக வறண்ட பகுதிகளில் ஒன்றாகக் காணப்படும் எகிப்திய பாலைவனம், கோடிக்கணக்கான ஆண்டுகளுக்கு முன்பு சுறாக்கள் உள்ளிட்ட ஏராளமான கடல்வாழ் உயிரினங்கள் வாழ்ந்த செழிப்பான கடல் பகுதியாக இருந்திருக்கலாம் என்பது இந்தக் கண்டுபிடிப்பின் மூலம் தெரியவந்துள்ளது.</strong></p>