ஏகாதிபத்திய யுத்த வெறியால் எரிபொருள் விலை உயர்வு: கோவை விமான நிலையத்தில் சரக்கு போக்குவரத்து கடும் சரிவு!

<p>ஏகாதிபத்திய யுத்த வெறியால் எரிபொருள் விலை கடும் உயர்வு மற்றும் சரக்கு கையாளும் கட்டணம் 80 சதவீதம் உயர்வு காரணமாக சிறு, குறு ஏற்றுமதியாளர்கள் கடுமாக பாதிக்கப்பட்டுள்ளனர்.</p><p>ஈரான் - இஸ்ரேல் இடையே நிலவி வரும் போர் பதற்றத்தால் சர்வதேச சந்தையில் விமான எரிபொருள் விலை கடுமையாக உயர்ந்துள்ள நிலையில், கோவை சர்வதேச விமான நிலையத்தில் சரக்கு கையாளுதல் கட்டணம் அதிரடியாக 80 சதவீதம் வரை உயர்த்தப்பட்டுள்ளது. இதனால் கோவையிலிருந்து வெளிநாடுகளுக்கு அனுப்பப்படும் சரக்கு போக்குவரத்து பாதியாகக் குறைந்து, ஏற்றுமதித் தொழில் முடங்கும் அபாயம் ஏற்பட்டுள்ளது.</p><p>மத்திய கிழக்கு நாடுகளில் நிலவும் போர் சூழலை காரணம் காட்டி, எண்ணெய் நிறுவனங்கள் எரிபொருள் விலையை உயர்த்தியுள்ளன. இதன் விளைவாக, விமான நிறுவனங்கள் தங்களின் சரக்கு கட்டணத்தை வரலாறு காணாத வகையில் உயர்த்தியுள்ளன. குறிப்பாக, கோவையிலிருந்து ஷார்ஜாவிற்கு இயக்கப்படும் சரக்கு விமான சேவைகள் பெரும் பாதிப்புக்குள்ளாகியுள்ளன.</p><p>கோவை மற்றும் அதன் சுற்றுவட்டார மாவட்டங்களிலிருந்து ஷார்ஜா உள்ளிட்ட வளைகுடா நாடுகளுக்கு வாரந்தோறும் டன் கணக்கில் சரக்குகள் அனுப்பப்பட்டு வந்தன. </p><p>தற்போது கட்டண உயர்வு காரணமாக:</p><p>சரக்கு முன்பதிவுகள் மிகக் கடுமையான வீழ்ச்சியைச் சந்தித்துள்ளன. குறிப்பாக இயந்திர உதிரிபாகங்கள், ஜவுளிப் பொருட்கள் போன்ற அழுகாத பொருட்களின் ஏற்றுமதி முற்றிலும் சரிந்துள்ளது. ஏற்கனவே ஆர்டர் பெற்ற சிறு, குறு ஏற்றுமதியாளர்கள், இந்த கூடுதல் கட்டணத்தைச் செலுத்த முடியாமல் நஷ்டத்தைச் சந்தித்து வருகின்றனர்.</p><p>கோவை - ஷார்ஜா இடையிலான மாதாந்திர சரக்கு போக்குவரத்து செயல்பாடுகள் கடந்த சில வாரங்களாகவே மந்தமடைந்துள்ளன. வான்வழிப் பாதையில் நிலவும் பதற்றம் மற்றும் கூடுதல் எரிபொருள் தேவை ஆகியவற்றைச் சுட்டிக்காட்டி விமான நிறுவனங்கள் கட்டணத்தைக் குறைப்பதற்கு மறுத்து வருகின்றன.</p><p>ஏகாதிபத்திய நாடுகளின் அதிகாரப் போட்டியால் ஏற்படும் இந்த விலை உயர்வின் சுமையை, உழைக்கும் மக்கள் மீதும் சிறு தொழில்கள் மீதும் சுமத்துவதை ஒன்றிய அரசு தடுக்க வேண்டும் என கோயம்புத்தூர் மாவட்ட சிறு தொழில்கள் சங்கத்தினர் (COSSIA) மற்றும் ஏற்றுமதியாளர்கள் வேதனை தெரிவித்துள்ளனர். ஒன்றிய சிவில் விமான போக்குவரத்து அமைச்சகம் தலையிட்டு, இந்த கட்டண உயர்வை முறைப்படுத்த வேண்டும் என்பதே கோவை தொழில்முனைவோரின் கோரிக்கையாக உள்ளது.</p>