கரப்பான் பூச்சிகளும், நெருப்புக்கோழிகளும்

<p><strong>கரப்பான் பூச்சிகளும், நெருப்புக்கோழிகளும்</strong></p><p>ஒருவிதமான அமைதியின்மை நிலவுகிறது. முன்னேறிச் செல்வதற்கான எதிர்பார்ப்பும், சொல்லப்போனால் ஒருவிதத் தீவிரமான உந்துதலும் காணப்படுகிறது. சட்டமன்றத் தேர்தல் முடிவுகளின் பின்னணியில் பார்க்கும்போது, தற்போதைய சூழல் ஒருவித எதார்த்தமற்ற தன்மையைக் கொண்டதாகத் தோன்றுகிறது. ஓர் அரசியல் சக்தியாக பாஜக வெல்ல முடியாதது என்றும், அதற்கு மாற்றே இல்லை என்றும் ஒரு பிம்பத்தை உருவாக்கும் முயற்சியில் ஆர்எஸ்எஸ் (RSS) இயக்கமும் பாஜகவும் தீவிரமாக ஈடுபட்டுள்ளன. இத்தகைய சூழல் இந்திய ஜனநாயகத்தை எங்கே கொண்டு சென்று நிறுத்தி இருக்கிறது?</p><p>காரல் மார்க்ஸ், 1852-இல் வெளியான ‘லூயிஸ் போனபார்ட்டின் பதினெட்டாவது புரூமேர்’ (The Eighteenth Brumaire of Louis Bonaparte) என்ற தனது கட்டுரையில், வரலாறு என்பது மனிதர்களின் கற்பனையால் அல்ல, மாறாக நிஜ உலகச் சூழல்களாலேயே வடிவமைக்கப்படுகிறது என்று குறிப்பிட்டார். அவர் எழுதினார்:</p><p>“மனிதர்கள் தங்கள் வரலாற்றைத் தாங்களே படைக்கிறார்கள். ஆனால், அவர்கள் விரும்பியபடியெல்லாம் அதை அமைத்துக்கொள்வதில்லை. தாங்களாகவே தேர்ந்தெடுத்த சூழல்களில் அவர்கள் அதை உருவாக்குவதில்லை; மாறாக, நேரடியாக எதிர்கொள்ளப்படும், ஏற்கெனவே அமைந்திருக்கும் மற்றும் கடந்த காலத்திலிருந்து கைமாறி வந்த சூழல்களிலேயே அதை உருவாக்குகிறார்கள்.”</p><p>மார்க்சின் இந்தக் கூற்று, இன்றைய சூழலுக்கும் மிகப் பொருத்தமானதாகவேத் தோன்றுகிறது. எந்தவொரு கேள்வியையும் ‘தேசவிரோதமானது’ என்று முத்திரை குத்தும் ஒரு சூழலில், கடந்த பதினைந்து நாட்களில் இணையவெளியில் (Cyberspace) நிகழ்ந்தவை நம்பவே முடியாதவையாக உள்ளன. அரசாங்கத்தைக் கேள்வி கேட்க முயன்றவர்களை ‘கரப்பான் பூச்சிகள்’ என்றும் ‘ஒட்டுண்ணிகள்’ என்றும் கூறி அற்பமாக நிராகரித்த அந்தச் செயல், பலரது உணர்வுகளை ஆழமாகப் பாதித்தது.</p><p>உயிருள்ள மனிதர்களை - குறிப்பாக இளைய தலைமுறையினரை - இவ்வாறு எள்ளிநகையாடியதன் பின்னணியை உன்னிப்பாக ஆராய்ந்தால், அதில் ஆழமான அர்த்தங்கள் பொதிந்திருப்பது புலப்படும். கரப்பான் பூச்சிகளின் பரிணாம வளர்ச்சி வரலாறு, மிகக் கடினமான சூழல்களிலும் அவை நிலைத்திருக்கும் தன்மையை உறுதிப்படுத்துகிறது. அச்சுறுத்தும் அமைதியையும் அலட்சியப் போக்கையும் உடைக்க முற்படும் ஓர் இனமாகவே அவை தோன்றுகின்றன.</p><p><strong>தேசியத் தேர்வுகள் முகமையின் தோல்வியும் நெருப்புக்கோழி மனோபாவமும்</strong></p><p>நமது இளைஞர்களுக்கு நேர்ந்துள்ள நிலைமைக்கு இது ஒரு வெளிப்படையான எதிர்வினை என்பதைப் புரிந்துகொள்ள எந்தவொரு சிக்கலான ஆராய்ச்சியும் தேவையும் இல்லை. தேசியத் தேர்வுகள் முகமையால் (NTA) நடத்தப்பட்ட அனைத்து மையப்படுத்தப்பட்ட தேர்வுகளும் சீர்குலைந்துவிட்டன. சொல்லப்போனால், அவை முறைகேடுகளுக்கு உள்ளாகியிருக்கவும் கூடும். இதன் விளைவாக, அவை ரத்து செய்யப்பட்டுள்ளன, செல்லாததாக்கப்பட்டுள்ளன அல்லது ஒரு நிச்சயமற்ற நிலையில் தொங்கிக்கொண்டி ருக்கின்றன. இதில் நீட் (NEET-UG), சிபிஎஸ்இ-இன் கணினிவழி விடைத்தாள் திருத்தும் முறை மற்றும் தற்போது ஐஐடி-களுக்கான ஜேஇஇ (JEE) தேர்வு ஆகியவையும் அடங்கும்.</p><p>2026-ஆம் ஆண்டில் இந்த நிலைமை உச்சகட்டத்தை எட்டியுள்ளது. இந்த ஒட்டுமொத்த நிகழ்வுகளிலும் மிகவும் அருவருக்கத்தக்க விஷயம் என்னவென்றால், இந்த முறைகேடுகள் தொடர்பாக, மனிதவள மேம்பாட்டு அமைச்சகத்திடமிருந்தோ (HRD), ஒன்றிய அரசாங்கத்திடமிருந்தோ பொறுப்புக்கூறும் மனப்பான்மை கிஞ்சிற்றும் இல்லாதிருப்பதாகும். உண்மையில் இவர்கள் ஜனநாயகத்தை மதிப்பவர்களாக இருந்தால், குறைந்தபட்சம் பொறுப்புணர்வையாவது வெளிப்படுத்தி இருப்பார்கள். ஆனால் துரதிர்ஷ்டவசமாக, இவர்கள் ஆபத்து வரும்போது மணலில் தலையைப் புதைத்துக் கொள்ளும் நெருப்புக்கோழிகள் (ostriches) போன்று இருக்கிறார்கள். இத்தகைய மாற்றுச் சிந்தனையற்ற, சிந்தனை வறட்சியான போக்கு ஒரு பாசிசச் சூழல் உருவாவதற்கான மிகச் சிறந்த களமாகும்.</p><p><strong>பொறுப்புக்கூறல் இன்மையும் இளைஞர்களின் இணையவழிப் போராட்டமும்</strong></p><p>தேர்ந்தெடுக்கப்பட்ட அரசாங்கத்தின் மீதான இளைய தலைமுறையினரின் நம்பிக்கையை மீட்டெடுக்க, ஒரு ஜனநாயக நாட்டில் மனிதவள மேம்பாட்டுத் துறை அமைச்சர் தர்மேந்திர பிரதான் உடனடியாகப் பதவி விலகுவது என்பது குறைந்தபட்ச எதிர்பார்ப்பாகும். இது 2026ஆம் ஆண்டுத் தேர்வுகள் தொடர்பான பிரச்சினை மட்டுமல்ல, கடந்த காலங்களில் தேசியத் தேர்வுகள் முகமை நடத்திய இது போன்ற 70-க்கும் மேற்பட்ட தேர்வுகள் சந்தேகத்திற்குரியவைகளாக மாறியுள்ளன என்பது கடுமையான நடவடிக்கையை அவசியமாக்குகிறது.</p><p>இளைய தலைமுறையினரின் குறியீட்டு அடையாளமான ‘கரப்பான் பூச்சிகள்’ இப்போது போராட்டக் களத்தில் இறங்கியுள்ளன. நிர்வாகத் தோல்வியும், அதைவிட முக்கியமாக, பொறுப்புக்கூறல் அறவே இல்லாத சூழலும் ஏதோ ஒரு வகையிலான கிளர்ச்சியைத் தூண்டியிருக்கவே செய்யும். இன்றைய இளைஞர்கள் திறமையற்றவர்கள் அல்ல; மாறாக, டிஜிட்டல் தளத்தில் அவர்கள் மிகவும் திறமையானவர்கள். எனவே, அவர்களது போராட்டக் களம் இணையவெளியாக அமைந்ததில் ஆச்சரியமில்லை.</p><p>‘கரப்பான் பூச்சி ஜனதா கட்சி’ (CJP), பிரதானின் ராஜினாமாவைக் கோருவதோடு மட்டுமே நின்றுவிட்டது; அது இதுவரை முறையான மற்றும் கட்டமைப்பு ரீதியான கேள்விகளை எழுப்பவில்லை. இந்தியா போன்ற பரந்த மற்றும் பன்முகத்தன்மை கொண்ட ஒரு நாட்டில், சேர்க்கைக்கான நுழைவுத் தேர்வுகளை ஒரு மையக் கட்டுப்பாட்டிற்குள் கொண்டுவருவது தோல்வியிலேயே முடியும். அதோடு, தகுதியைவிட ஆர்எஸ்எஸ் சித்தாந்தம் சார்ந்த நபர்களை முக்கியப் பதவிகளில் அமர்த்துவதில் பாஜக காட்டும் ஆர்வம், இந்தப் பிரச்சனையை மேலும் தீவிரமாக்குகிறது.</p><p>இல்லையெனில், இந்திய விமானப்படைக்குச் சொந்தமான விமானங்களில் வினாத்தாள்களைக் கொண்டு செல்வது அல்லது பிரதமர் நேரில் தேர்வை மேற்பார்வை யிடுவது போன்ற யோசனைகள் மூலம் இந்தப் பிரச்சினை தீர்க்கப்படும் என்று யார் எதிர்பார்ப்பார்கள்? மனிதரல்லாத (non-biological) சக்திகள் இத்தகைய அதீதப் பொறுப்புகளைச் செய்வதாகக் கற்பனை செய்துகொண்டால் கூட, அது மிகையான எதிர்பார்ப்பாகவே இருக்கும். பொதுத் தேர்வுகளை நடத்துவது போன்ற சிக்கலான பணிகளைத் தனியார் கல்வி மாஃபியாக்கள் குறைபாடின்றிச் செய்வார்கள் என்று அவர்கள் மீது வைக்கும் அசைக்க முடியாத நம்பிக்கையும் ஒரு விசித்திரமான யோசனையே. மாணவர்களின் எதிர்காலம் குறித்த அக்கறையைப் புறக்கணித்துவிட்டு லாப நோக்கத்தை மட்டுமே முன்னிறுத்துவது என்பது, ஒருபோதும் சாத்தியப்படாத அல்லது ஏற்றுக்கொள்ள முடியாத அணுகுமுறையாகும்.</p><p><strong>தொழிலாளர் வர்க்கத்தின் குமுறலும் வர்க்க இணைப்பும்</strong></p><p>பொது நிதியுதவி பெறும் கல்வி மற்றும் பிற நிறுவனங்களின் மதிப்பைத் தீர்மானிக்கும் செயல்முறையானது, தேசிய அளவில் பின்பற்றப்படும் கொள்கைகளுக்கு முற்றிலும் முரணாக அமைந்திருப்பது ஒரு முக்கியமான அம்சமாகும். வெள்ளைச்சட்டை ஊழியர்கள் (white-collar workers), குறைந்த ஊதியம் பெறும் ‘கிக்’ (gig) தொழிலாளர்கள், வாழ்வாதாரத்திற்காக மட்டுமே உழைக்கும் முறைசாராத் தொழிலாளர்கள் என யாராக இருந்தாலும், தற்போதைய வேலைச் சூழல் அவர்களைப் போராட்டக் களத்திற்குத் தள்ளும் என்பதில் ஐயமில்லை. எனவே, ‘கரப்பான் பூச்சிகள்’ விவகாரத்திற்கும், நொய்டா, மனேசர், உத்தரகாண்ட் அல்லது வட இந்தியாவின் பிற பகுதிகளில் (இவை பாரம்பரியமாகத் தொழிற்சங்கங்களின் வலுவான தளங்களாக இல்லாதிருக்கலாம்) தொழிலாளர்கள் எதிர்கொண்ட நிகழ்வுகளுக்கும் இடையிலான தொடர்பு தெளிவாகத் தெரிந்தது. ஒட்டுமொத்த இளைய தலைமுறையினரும் கடும் ஆத்திரத்தில் கொதித்துக்கொண்டிருக்கிறார்கள் என்பது நிதர்சனமான உண்மையாகும்.</p><p><strong>நீதித்துறையின் பாராமுகமும் முற்போக்கு சக்திகளின் கடமையும்</strong></p><p>நீதித்துறையில் சில பிரிவுகளின் தில்லுமுல்லுகளையும், தேர்தல் ஆணையத்தின் செயல்பாடுகளையும் இந்த ‘கரப்பான் பூச்சி ஜனதா கட்சி’ சுட்டிக்காட்டியுள்ளது. நிலைமையை மாற்றுவதற்கான விரக்தியையும் மன உளைச்சலையும் நம்பகமான முறையில் வெளிப்படுத்த வழிகள் எதுவும் கிடைக்காதபோது இது தவிர்க்க முடியாததாகிறது. அந்த வகையில், தலைமை நீதிபதி சூர்யா காந்தின் கருத்து ஒரு தூண்டுதலாக அமைந்தது என்பது ஒரு தற்செயல் நிகழ்வை விட மேலானது.</p><p>உச்சநீதிமன்றம் வாக்காளர்களின் அரசமைப்புச் சட்ட உரிமையை விட, தேர்தல் ஆணையத்தின் அதிகாரங்கள் மீதே அதிக அக்கறை கொண்டிருக்கிறது. இது தற்போதைய சூழ்நிலையின் ஒரு வருத்தமான விமர்சனம். எனவே, கரப்பான் பூச்சிகளும் நெருப்புக்கோழிகளும் நமது சமகால நிலப்பரப்பிற்கு இன்னும் அடிக்கடி வருகை தரும். இந்தச் சூழலில்தான், ஜனநாயகம் மற்றும் மதச்சார்பின்மையின் முற்போக்கு அரசியல் சக்திகள் தங்களை நிலைநிறுத்திக் கொண்டு, நமது காலத்தின் வரலாற்றைத் தீர்மானிப்பதில் தீவிரமாக ஈடுபட வேண்டும்.</p><p><strong>பீப்பிள்ஸ் டெமாக்ரசி, ஜூன் 14, 2026 / தமிழில் சுருக்கம்: ச. வீரமணி</strong></p><p><br></p>