சோவியத் யூனியனின் சமூக அறத்தைப் பாடிய சிங்கிஸ் ஐத்மாத்தவ்- பேரா.பெ.விஜயகுமார்

<p><strong>சோவியத் யூனியனின் சமூக அறத்தைப் பாடிய சிங்கிஸ் ஐத்மாத்தவ்- பேரா.பெ.விஜயகுமார்</strong></p><p>புனைவிலக்கிய உலகிற்கு சோவியத் யூனியன் அளித்துள்ள பங்களிப்பு மிகவும் காத்திரமானது. அதன் பதினைந்து பிரதேசங்களைச் சேர்ந்த எழுத்தாளர்களும் உலக இலக்கியத்தின் போக்கை மாற்றியமைக்கும் வகையில் தங்கள் பங்கைச் செலுத்தியுள்ளனர். அந்த வரிசையில், சோவியத் அங்கமான கிர்கிஸ்தானைச் சேர்ந்த சிங்கிஸ் ஐத்மாத்தவ் (1928-2008) மிக முக்கியமானவர். ஜமீலா, அன்னை வயல், முதல் ஆசிரியர், குல்சாரி, தி ஒயிட் ஷிப் போன்ற காலத்தால் அழியாத படைப்புகளை உலகுக்கு வழங்கிய அவர், ஸ்டாலின் காலத்திய சோவியத் யூனியனின் சமூகம், அரசியல் மற்றும் கலாச்சார நிலைமைகளைத் தனது எழுத்தில் மிக நுட்பமாகச் சித்தரித்தவர். அவருடைய தந்தை, அன்றைய சோவியத் சட்டங்களின் அடிப்படையில் ‘முதலாளித்துவ தேசியவாதி’ என்று குற்றம் சாட்டப்பட்டு கொல்லப்பட்டார். அத்தகைய துயரமான பின்னணியிலும், சிங்கிஸ் ஐத்மாத்தவ் சோவியத் கம்யூனிஸ்ட் கட்சியில் உறுப்பினராகவும், சுப்ரீம் சோவியத்தின் உறுப்பினராகவும் பொறுப்பு வகித்தார். லெனின் பரிசு பெற்ற இவரது படைப்புகள் தமிழ் உட்பட உலகின் பல மொழிகளில் மொழிபெயர்க்கப்பட்டுள்ளன. சோவியத் மக்களின் வாழ்வியலை வெறும் வரலாற்றுப் பதிவாகக் காட்டாமல், அதன் மனித விழுமியங்களை முன்னிறுத்தியது ஐத்மாத்தவ்வின் தனிச்சிறப்பு<strong>. </strong></p><p><strong>ஜமீலா: காதலின் சுதந்திரம் </strong></p><p>1958-இல் எழுதிய ‘ஜமீலா’ குறுநாவல் உலகின் மிகச் சிறந்த காதல் கதைகளில் ஒன்றாகப் போற்றப்படுகிறது. இரண்டாம் உலகப் போரின் உச்சகட்டக் காலத்தில், சோவியத் யூனியனின் வெற்றிக்குத் தேவையான கோதுமை விளைவிக்கும் கூட்டுப் பண்ணையில் ஜமீலா உழைக்கிறாள். அவளது கணவன் சாடிக் ராணுவத்தில் இருக்கிறான். அவனது தம்பி சேட் பார்வையில் கதை விரிகிறது. கிராமத்தின் ஆண்கள் அனைவரும் போரில் இருந்தமையால், பெண்கள் கடினமான உழைப்பில் ஈடுபட வேண்டியிருந்தது. தானியத்தை இரயிலடிக்குக் கொண்டு செல்லும் அந்தப் பணியில் ஜமீலா ஈடுபடுகிறாள். அவர்களுடன் டேனியர் என்ற போர் ஊனமுற்ற வீரன் இணைகிறான். டேனியரின் இனிமையான குரலும், வாழ்க்கையைப் பற்றிய உற்சாகமான பார்வையும் ஜமீலாவின் மனதில் காதலை விதைக்கின்றன. கணவனிடமிருந்து ஜமீலா எதிர்பார்த்த அன்பு கிடைக்காத நிலையில், டேனியரின் உண்மையான அன்பு அவளைப் பரவசப்படுத்துகிறது. சமூகம் ஏற்றுக்கொள்ளாத அந்த நேர்மையான காதல், இறுதியில் இருவரும் கிராமத்தை விட்டு வெளியேறுவதோடு முடிகிறது. இது வெறும் காதல் கதை மட்டுமல்ல, ஒரு பெண்ணின் சுதந்திரப் பிரகடனமாகவும் அமைந்தது. </p><p><strong>முதல் ஆசிரியர்: கல்வி ஒரு விடுதலை வேள்வி</strong> </p><p>லெனின் முன்னெடுத்த எழுத்தறிவு இயக்கத்தின் பின்னணியில், துய்ஷென் என்ற இளைஞனின் கதையைப் பேசுகிறது ‘முதல் ஆசிரியர்’. முன்னாள் ராணுவ வீரரான துய்ஷென், ‘குர்குரோ’ என்ற கிராமத்தில் எழுத்தறிவின்மையைப் போக்கப் பள்ளி ஒன்றைத் தொடங்கப் போராடுகிறார். சமூகத்தின் கடும் எதிர்ப்பையும் மீறி, பாழடைந்த குதிரை லாயத்தைச் சுத்தப்படுத்திப் பள்ளிக்கூடமாக்குகிறார். அல்தினா என்ற சிறுமியின் அறிவுக் கண்ணைத் திறக்க அவர் எடுக்கும் முயற்சிகள் நெஞ்சைத் தொடுபவை. அல்தினா அத்தையால் கட்டாயத் திருமணம் செய்துவைக்க முயன்றபோது, துய்ஷென் சோவியத் படை வீரர்களின் உதவியுடன் அவளை மீட்டுத் தற்காத்துக் காப்பாற்றுகிறார். பிற்காலத்தில் தத்துவப் பேராசிரியராக வளரும் அல்தினா, தன் வாழ்வின் வெற்றிக்காகத் தனது முதல் ஆசிரியரின் நினைவைப் போற்றுகிறாள். ஆசிரியர்-மாணவர் உறவின் புனிதத்தை உணர்த்தும் இந்நாவல், கல்வி ஏன் ஒரு சமூக மாற்றத்திற்கான கருவி என்பதை ஒவ்வொரு ஆசிரியருக்கும் நினைவூட்டுகிறது. </p><p><strong>ஃபேர்வெல் குல்சாரி: வீழ்ச்சியின் குறியீடு</strong> </p><p>மனிதனுக்கும் மிருகத்திற்குமான உறவைப் பேசும் இக்கதை, சோசலிசக் கட்டுமானத்தின் வீழ்ச்சியைச் சித்தரிக்கும் ஒரு சோக கீதமாகும். ஸ்டாலின் மறைவுக்குப் பிறகு 1950களில் தொடங்கிய அதிகார வர்க்கத்தின் ஆணவமும், லெனினியப் பாதையிலிருந்து தடம் புரண்ட நிர்வாகச் சூழலும் குல்சாரி என்ற குதிரையின் வீழ்ச்சி வழியாகக் காட்டப்படுகிறது. டானாபாய் என்ற நேர்மையான விவசாயியின் உழைப்பைப் புறக்கணிக்கும் அதிகாரிகள், அவர் வளர்த்த குல்சாரியையும் கவனிப்பாரின்றி சித்திரவதை செய்கின்றனர். குல்சாரியின் இறப்பு, ஒரு சமூகத்தின் வீழ்ச்சியின் குறியீடாக அமைகிறது. லெனினியப் பாதையிலிருந்து விலகிச் சென்ற அதிகார வர்க்கத்தைக் கண்டு டானாபாய் படும் வேதனை நாவலின் மையப்புள்ளியாக உள்ளது. சோவியத் யூனியன் தனது இலட்சியங்களிலிருந்து மெல்ல மெல்ல வழுவியதை ஒரு குதிரையின் கதை வழியாக மிகக் கச்சிதமாக ஐத்மாத்தவ் காட்சிப்படுத்தியிருப்பார். குதிரையின் மரணம் என்பது வெறும் மரணமல்ல; அது ஓர் உன்னத கனவின் மறைவு. </p><p><strong>அன்னை வயல்: உழவனின் தியாகம்</strong> </p><p>’தி கிரேட் பேட்ரியாட்டிக் வார்’ என்று அழைக்கப்பட்ட இரண்டாம் உலகப் போரின் கொடுமைகளை, டொல்கொனெ என்ற பெண்மணியின் துயரம் வழியாக இந்நாவல் விளக்குகிறது. போர்க்களத்தில் கணவரையும், மூன்று மகன்களையும் பறிகொடுத்தாலும், தளராத உறுதியுடன் வயலில் உழைக்கும் டொல்கொனெ, போரின் கொடூரங்களை எதிர்கொள்கிறார். போர் வீரர்களின் தியாகத்திற்கு இணையாக, நிலத்தில் உழைக்கும் உழவர்களின் தியாகத்தையும் இக்கதை முன்னிறுத்துகிறது. கதையில் ‘நிலம்’ என்பது வெறும் மண் அல்ல; அது ஒரு உயிருள்ள கதாபாத்திரமாகவே உலவுகிறது. கடைசியாக தன் மருமகளையும், பிறகு போரில் தன் நால்வரையும் இழந்த பின்னும், தன் பேரனை வளர்க்கும் கடமையுடனும், எதிர்கால நம்பிக்கையுடனும் வாழும் அவர் உறுதி, வாசிப்பவர் மனதை நெகிழச் செய்கிறது. டொல்கொனெயின் வாழ்வு, போருக்கும் உழைப்பிற்குமான முரணை மிக அழுத்தமாகப் பதிவு செய்கிறது. </p><p><strong>தி ஒயிட் ஷிப்: மாய யதார்த்தம்</strong></p><p><strong> </strong>கிர்கிஸ்தானின் புராணக் கதைகள் மற்றும் அச்சிறுவனின் வெள்ளைக் கப்பல் மீதான கனவுகளை மையமாகக் கொண்டு மாய யதார்த்தவாத பாணியில் எழுதப்பட்ட நாவல் இது. தாத்தா மொமுனின் பாசத்தில் வளரும் அச்சிறுவன், தன் தந்தை ஏதோ ஒரு கப்பலில் வருவதாகக் கற்பனை செய்கிறான். சமூகத்தின் மூர்க்க குணம் மற்றும் நீண்ட கொம்புள்ள பெண் மானைக் கொல்வது போன்ற செயல்கள் அச்சிறுவனின் மனதை வதைக்கின்றன. சமூகத்தில் நிலவும் தீய சக்திகளின் செயல்பாடும், மானுடப் பண்புகள் சிதைக்கப்படுவதும் சிறுவனின் கனவைச் சிதைக்கின்றன. தன் தந்தையைச் சந்திக்கும் ஆசையில் ஏரியில் குதித்து சிறுவன் இறக்கும் முடிவு, உலகம் முழுவதும் பெரிய அதிர்வலைகளை ஏற்படுத்தியது<strong>. </strong></p><p><strong>ஐத்மாத்தவ்வின் இலக்கியப் பங்களிப்பு: ஒரு பார்வை</strong> </p><p>சிங்கிஸ் ஐத்மாத்தவ் தனது ஒவ்வொரு நாவலின் வழியாகவும் மானுட வாழ்வின் ஏதோ ஒரு புதிரை அவிழ்க்க முயற்சிக்கிறார். மனித இருப்பு, இயற்கை, காதல், அதிகாரம், போரின் வடுக்கள் என இவருடைய படைப்புகள் எப்போதும் மனித வாழ்வின் மீதான உண்மையான அக்கறையை வெளிப்படுத்துகின்றன. ஐத்மாத்தவ் வெறும் கதைசொல்லி மட்டுமல்ல, ஒரு சமூகத்தின் மனசாட்சியாக இருந்து அக்காலத்து அரசியல் மாற்றங்களை நுணுக்கமாகப் பதிவு செய்தவர். அவரது எழுத்தில் நிலம், நதிகள், மலைகள் மற்றும் விலங்குகள் கூட மனிதர்களோடு உரையாடுகின்றன. அந்த வகையில் அவர் இயற்கைக்கும் மனிதனுக்குமான பிணைப்பை மிக வலுவாகப் பேணினார். சோவியத் இலக்கியத்தின் போக்கை மாற்றியமைத்த பெருமை இவருக்கு உண்டு. அதிகாரத்தின் முன்னால் மண்டியிடாமல், ஒடுக்கப்பட்ட மக்களின் வாழ்வியலையும், அவர்களின் ஏக்கங்களையும் பதிவு செய்ததில் அவர் வெற்றி பெற்றுள்ளார். ஒரு படைப்பாளி சமூகத்தின் மாற்றங்களை எவ்வளவு கூர்மையாக கவனிக்க வேண்டும் என்பதற்கு ஐத்மாத்தவ் ஒரு சிறந்த முன்மாதிரி. மனித நினைவுகள் காலத்தின் சுழற்சியில் கரைந்து போகாமல் காப்பாற்றி வைக்கும் ஒரு வரலாற்று ஆவணமாகவே இவரது படைப்புகள் திகழ்கின்றன. ஒவ்வொரு வாசகனும் இவரது படைப்புகளை வாசிக்கும்போது, தான் ஒரு புதிய உலகிற்குள் நுழைவதையும், அது மானுட நேயத்தால் பிணைக்கப்பட்டிருப்பதையும் உணர முடியும். அந்த மாபெரும் கலைஞனின் எழுத்துக்கள், சமூக மாற்றத்திற்கான தேடலில் இருப்பவர்களுக்கு என்றும் ஒரு கலங்கரை விளக்கமாக இருக்கும்.</p>