அமெரிக்காவைவிட சீனாவுக்கு அதிக ஆதரவு: உலகளாவிய கருத்துக்கணிப்பு!

<p>உலக மக்களின் நம்பிக்கையை அதிகம் பெற்ற நாடாக அமெரிக்காவை பின்னுக்கு தள்ளி சீனா முதலிடத்தில் உள்ளதாக ஆய்வில் தெரியவந்துள்ளது.</p><p>உலகின் பெரும்பாலான நாடுகளில், அமெரிக்காவை விட சீனாவை மக்கள் அதிகம் விரும்புவதாக பியூ ஆய்வு மையம் (Pew Research Center) வெளியிட்டுள்ள புதிய கருத்துக்கணிப்பு தெரிவிக்கிறது. சுமார் 20 ஆண்டுகளுக்குப் பிறகு இந்த மாற்றம் ஏற்பட்டுள்ளதாகவும் அந்த ஆய்வு கூறுகிறது.</p><p>2026 பிப்ரவரி 8 முதல் மே 13 வரை, 35 நாடுகள் மற்றும் மேற்குக் கரை, கிழக்கு ஜெருசலேம் பகுதிகளில் மொத்தம் 42,151 பேரிடம் இந்த கருத்துக்கணிப்பு நடத்தப்பட்டது.</p><p>இதில் இடம்பெற்ற 36 நாடுகள் மற்றும் பிரதேசங்களில் 25 இடங்களில் சீனாவுக்கு அதிக ஆதரவு இருப்பதாகவும், இந்தியா, ஜப்பான், தென் கொரியா, பிலிப்பைன்ஸ், போலந்து மற்றும் இஸ்ரேல் ஆகிய 6 நாடுகளில் மட்டுமே அமெரிக்காவுக்கு அதிக ஆதரவு இருப்பதாகவும் தெரிவிக்கப்பட்டுள்ளது.</p><p>அமெரிக்க அதிபர் டொனால்ட் டிரம்பின் இரண்டாவது பதவிக்காலத்தில், அமெரிக்காவின் மீது உலக நாடுகளின் நம்பிக்கை குறைந்துள்ளதாக ஆய்வு கூறுகிறது. </p><p>அமெரிக்காவின் கூட்டு நாடுகளான கனடா, பிரான்ஸ், ஜெர்மனி, பிரிட்டன் உள்ளிட்ட பல நாடுகளில் கூட, டிரம்பை விட சீன அதிபர் ஷி ஜின்பிங் மீது மக்களுக்கு அதிக நம்பிக்கை இருப்பதாக கருத்துக்கணிப்பில் தெரியவந்துள்ளது.</p><p>மேற்காசியாவில் அமெரிக்காவின் ராணுவ நடவடிக்கைகள், கூட்டாளி நாடுகளுடன் ஏற்பட்ட சுங்கவரி மோதல்கள், கிரீன்லாந்து தொடர்பாக டிரம்ப் வெளியிட்ட கருத்துகள் உள்ளிட்டவை அமெரிக்காவின் மதிப்பை பாதித்ததாக ஆய்வு குறிப்பிடுகிறது.</p><p>அதே நேரத்தில், கொரோனா பெருந்தொற்றுக்குப் பிறகு சீனாவைப் பற்றிய உலக நாடுகளின் பார்வை மீண்டும் மேம்பட்டுள்ளதாகவும் ஆய்வு தெரிவிக்கிறது.</p><p>மேலும், லத்தீன் அமெரிக்கா, ஆப்பிரிக்கா, மத்திய கிழக்கு மற்றும் ஆசிய-பசிபிக் பகுதிகளைச் சேர்ந்த நடுத்தர வருமான நாடுகளில், அமெரிக்காவைவிட சீனா உலக அமைதி மற்றும் நிலைத்தன்மைக்கு அதிக பங்களிப்பு அளிக்கும் நாடு என்ற கருத்தும் அதிகரித்துள்ளது.</p>