பயணியர் போக்குவரத்தில் 6-வது இடத்திற்குத் தள்ளப்பட்டது சென்னை விமான நிலையம்

<p><strong>பயணியர் போக்குவரத்தில் 6-வது இடத்திற்குத் தள்ளப்பட்டது சென்னை விமான நிலையம்</strong></p><p>சென்னை, மே 31 - ஒரு காலத்தில் தென்னிந்தியாவின் நுழைவாயிலாகத் திகழ்ந்த சென்னை விமான நிலையம், தற்போது நாட்டின் பிற முக்கிய பெருநகர விமான நிலையங்களை விடப் பின்னுக்குத் தள்ளப்பட்டு, பயணியர் போக்குவரத்தில் நாட்டின் ஆறாவது பரபரப்பான விமான நிலையமாக மாறியுள்ளது. </p><p>கடந்த ஏப்ரல் மாதத்தில் சென்னை விமான நிலையம் மொத்தம் 17.3 லட்சம் பயணியர் போக்குவரத்தைப் பதிவு செய்துள்ளது. இது 17.6 லட்சம் பயணியர் போக்குவரத்தைப் பதிவு செய்த கொல்கத்தா விமான நிலையத்தை விடக் குறைவாகும். </p><p>பத்தாண்டுக்கு முன்பு பயணியர் போக்குவரத்தில் சென்னைக்கு பின்னால் இருந்த பெங்களூரு விமான நிலையம், தற்போது ஒட்டுமொத்த பயணியர் போக்குவரத்தில் நாட்டின் மூன்றாவது பரபரப்பான விமான நிலையமாக உருவெடுத்துள்ளது. </p><p>உள்நாட்டுப் பயணியர் போக்குவரத்தில் மட்டும் பெங்களூரு விமான நிலையம், கடந்த ஏப்ரல் மாதத்தில் 31.7 லட்சம் பயணிகளைக் கையாண்டு மும்பை விமான நிலையத்தையே முந்தியுள்ளது குறிப்பிடத்தக்கது. </p><p>முக்கிய விமான நிலையங்களின் பயணியர் போக்குவரத்து ஒப்பீடு இந்திய விமான நிலையங்கள் ஆணையத்தின் தரவுகளின்படி, கடந்த பத்து ஆண்டுகளில் (ஏப்ரல் 2016 மற்றும் ஏப்ரல் 2026) நாட்டின் முக்கிய விமான நிலையங்களின் ஒட்டுமொத்த பயணியர் போக்குவரத்து விவரம் வருமாறு: </p><p><strong>விமான நிலையம் ஏப்ரல் 2016 ஏப்ரல் 2026 </strong></p><p><strong>புதுதில்லி 44,42,850 66,52,190</strong></p><p><strong>மும்பை 36,27,478 40,47,235 </strong></p><p><strong>பெங்களூரு 17,93,629 36,85,135 </strong></p><p><strong>ஹைதராபாத் 11,24,721 22,49,965 </strong></p><p><strong>கொல்கத்தா 11,23,509 17,64,280 </strong></p><p><strong>சென்னை 14,02,247 17,39,902 </strong> </p><p><strong>பின்னடைவுக்கான காரணங்களும் அதிகாரிகளின் விளக்கமும்</strong> </p><p>சென்னை விமான நிலையத்தின் இந்த மந்தமான வளர்ச்சி குறித்து இந்திய விமான நிலையங்கள் ஆணையத்தின் அதிகாரிகள் கூறுகையில், புதிய ஒருங்கிணைந்த முனையக் கட்டிடம் கட்டி முடிக்கப்பட்டவுடன் பயணியர் போக்குவரத்து கணிசமாக அதிகரிக்கும் என்று தெரிவித்துள்ளனர். </p><p>மேலும், கடந்த இரண்டு மாதங்களில் எரிபொருள் விலை உயர்வு காரண மாக சில விமான நிறுவனங்கள் தங்களின் சேவைகளை ரத்து செய்துள்ளதும் இந்த சரிவுக்கு ஒரு காரணமாகும். </p><p>இது தவிர, விமான நிலையத்தின் ஏர்சைடு (airside) பணிகள் நிறைவடையும் போது, சென்னையின் பயணியர் போக்கு வரத்து மீண்டும் உயரும் என்று அதிகாரிகள் நம்பிக்கை தெரிவித்துள்ளனர்.</p><p>இருப்பினும், சென்னை விமான நிலையத்தின் தற்போதைய பராமரிப்பு குறைபாடுகள் மற்றும் பிளாசா (plaza), டி3 (T3) சர்வதேச முனையக் கட்டிடம் திறக்கப்படுவதில் ஏற்பட்டுள்ள தாமதம் குறித்து பயணியர் தொடர்ந்து தங்களது அதிருப்தியை வெளிப்படுத்தி வருகின்றனர்.</p><p>விமான நிலையத்தின் கழிவறைகள், நாற்காலிகள் பராமரிப்பு மற்றும் உள்நாட்டு, சர்வதேச முனையங்களில் உள்ள உணவகங்கள் மற்றும் கடைகளின் தேர்வுகள், தனியாரால் நிர்வகிக்கப்படும் பிற விமான நிலையங்களுடன் ஒப்பிடும்போது மிகவும் குறை வாகவே உள்ளதாகப் பயணியர் குற்றம் சாட்டுகின்றனர்.</p><p>சென்னை விமான நிலையத்தின் தற்போதைய உள்கட்ட மைப்பு வசதிகள் திருப்திகரமாக இல்லை என்றும், பெங்க ளூரு, ஹைதராபாத் போன்ற தனியாரால் இயக்கப்படும் விமான நிலையங்கள் கூடுதல் விமான நிறுவனங்களையும், புதிய வழித்தடங்களையும் ஈர்த்து வருவதாகவும் தென்னி ந்திய வர்த்தக மற்றும் தொழில்துறை சபையின் (SICCI) மூத்த துணைத் தலைவர் வி.என்.சிவ சங்கர் தெரிவித்துள்ளார். </p><p><strong>தாமதமாகும் பணிகள்</strong></p><p>விமான நிலைய வளாகத்தில் டாக்ஸிகளுக்கான இரண் டாவது பிக்-அப் பாயிண்டாக அமையவிருக்கும் பிளாசா பகுதி, அனைத்து பணிகளும் முடிந்து தயாராக இருந்த போதிலும் இன்னும் பயன்பாட்டிற்குத் திறக்கப்படவில்லை.</p><p>அதேபோல், பலமுறை தாமதங்களைச் சந்தித்துள்ள டி3 (T3) முனையக் கட்டுமானப் பணிகள், நடப்பு ஆண்டின் இறுதிக்குள் மட்டுமே முழுமையாக நிறைவடையும் என்று எதிர்பார்க்கப்படுகிறது.</p>