சிபிஐ இயக்குநர் நியமனம்: 2012-ல் வெளியிட்ட தகவலை இப்போது மறைக்கும் ஒன்றிய அரசு!

<p>சிபிஐ இயக்குநர் நியமன செயல்முறை குறித்து 2012ஆம் ஆண்டு தகவல் அறியும் உரிமைச் சட்டம் (RTI) மூலம் வெளியிடப்பட்ட தகவல்களை, தற்போது ஒன்றிய அரசு “ரகசியம்” எனக் கூறி மறுத்துள்ளது.</p><p>ஆர்.டி.ஐ ஆர்வலர் கமோடோர் லோகேஷ் பத்ரா, சமீபத்தில் சிபிஐ இயக்குநர் நியமனம் தொடர்பாக தகவல் கோரி மனு தாக்கல் செய்திருந்தார். இந்த செயல்முறையின் முடிவாக, தற்போதைய சிபிஐ இயக்குநர் பிரவீண் சூத்திற்கு மேலும் ஒரு ஆண்டு பதவி நீட்டிப்பு வழங்கப்பட்டது.</p><p>பத்ரா தனது RTI மனுவில்,</p><p>எந்த IPS அதிகாரிகள் பரிசீலிக்கப்பட்டனர்?</p><p>தேர்வுக்குழுவில் என்ன விவாதங்கள் நடந்தன?</p><p>கூட்ட குறிப்புகள் என்ன?</p><p> என பல்வேறு தகவல்களை கேட்டிருந்தார். ஆனால் பணியாளர் மற்றும் பயிற்சி துறை (DoPT), அந்த தகவல்களை வெளியிட மறுத்துள்ளது.</p><p>அரசு தரப்பில், இவை ரகசிய ஆவணங்கள், அதிகாரிகளின் தனிப்பட்ட தகவல்கள் இதில் உள்ளன, தகவல் வெளியிட்டால் தேர்வு செயல்முறையின் நம்பகத்தன்மை பாதிக்கப்படும் என்ற காரணங்கள் கூறப்பட்டுள்ளன.</p><p>இதற்கு எதிர்ப்பு தெரிவித்துள்ள கமோடோர் பத்ரா, “2012ஆம் ஆண்டு இதே வகையான தகவல்களை அரசு வெளியிட்டது. இப்போது ஏன் மறைக்கிறது?” என்று கேள்வி எழுப்பியுள்ளார்.</p><p>2012ஆம் ஆண்டு வெளியிடப்பட்ட ஆவணங்களில், 61 IPS அதிகாரிகளின் பெயர்கள், அவர்களின் விவரங்கள், தேர்வு செயல்முறையில் நடந்த விவாதங்கள் மற்றும் சில அதிகாரிகளுக்கு எதிரான புகார்கள் உள்ளிட்ட விவரங்கள் இடம்பெற்றிருந்தன.</p><p>மேலும், RTI சட்டத்தின் கீழ் ரகசியமான பகுதிகளை மட்டும் மறைத்து, மீதமுள்ள தகவல்களை வெளியிடும் வசதியும் உள்ளது. ஆனால் அந்த விதியை பயன்படுத்தாமல் அரசு முழுமையாக தகவலை மறுத்துள்ளதாக பத்ரா குற்றம்சாட்டுகிறார்.</p><p>இதற்கிடையில், எதிர்க்கட்சித் தலைவர் ராகுல் காந்தியும் சமீபத்திய சிபிஐ இயக்குநர் தேர்வு செயல்முறையில் முழுமையான ஆவணங்கள் வழங்கப்படவில்லை என்று குற்றம்சாட்டியிருந்தார்.</p><p>அரசியல் முக்கியத்துவம் வாய்ந்த வழக்குகளை விசாரிக்கும் சிபிஐ அமைப்பின் தலைவரை தேர்வு செய்யும் செயல்முறை வெளிப்படையாக இருக்க வேண்டும் என்று RTI செயற்பாட்டாளர்கள் வலியுறுத்தி வருகின்றனர்.</p><p>இந்த சூழலில், முக்கிய அரசு நியமனங்களில் வெளிப்படைத்தன்மை படிப்படியாக குறைக்கப்படுகிறதா என்ற கேள்வி மீண்டும் எழுந்துள்ளது.</p><p><br></p>