பட்டை மூங்கில் சுறாக்கள் வெற்றிகரமாக கடலில் விடுவிப்பு

<p><strong>பட்டை மூங்கில் சுறாக்கள் வெற்றிகரமாக கடலில் விடுவிப்பு</strong></p><p>சென்னை,ஜூன் 7- இந்திய கடல்சார் வரலாற்றில் முதல்முறையாக, சென்னையில் உள்ள விஜிபி மெரைன் கிங்டம் தனது கண்காணிப்பில் வளர்க்கப்பட்ட ‘பேண்டட் மூங்கில்’ (பட்டை மூங்கில்) சுறாக்களை வெற்றிகரமாகக் கடலில் விடுவித்து புதிய சாதனை படைத்துள்ளது. கடல் வளங்களைப் பாதுகாப்பதிலும், பொறுப்பான முறையில் மீன்வளத்தை மேம்படுத்துவதிலும் இது ஒரு முன்னோடித்துவ சாதனையாகும்.தமிழ்நாடு மீன்வளத்துறை அமைச்சர் ஏ. ஸ்ரீநாத் முன்னிலையில் நடைபெற்ற இந்நிகழ்வில், கடல்சார் ஆராய்ச்சியாளர்கள் மற்றும் சமூக ஆர்வலர்கள் பலர் கலந்துகொண்டனர். அறிவியல் பூர்வமான வளர்ப்பு முறைகள் மூலம் கடல் வாழ்விடங்களை எவ்வாறு பாதுகாக்க முடியும் என்பதற்கு இந்த முயற்சி ஒரு சிறந்த எடுத்துக்காட்டாகும் என அமைச்சர் பாராட்டினார். மேலும், விஜிபி குழுமத் தலைவர் விஜி சந்தோஷம் மற்றும் இயக்குநர் விஜிபிஆர் பிரேம் தாஸ் ஆகியோர், இந்தச் சாதனை கடல்சார் கல்வி, பாதுகாப்பு மற்றும் அறிவியல் கற்றலுக்கான தங்களின் நோக்கத்தை மெய்ப்பித்துள்ளதாக நெகிழ்ச்சியுடன் தெரிவித்தனர். சென்னையின் கிழக்குக் கடற்கரைச் சாலையில் அமைந்துள்ள இந்தியாவின் முதல் ‘வாக்-த்ரூ’ மீன் காட்சியகமான விஜிபி மெரைன் கிங்டம், வெறும் பொழுதுபோக்கு இடமாக மட்டுமில்லாமல், கடல் சூழலியலைப் பாதுகாக்கும் ஒரு முன்னணி மையமாகத் தன்னை நிலைநிறுத்தியுள்ளதாக அவர்கள் தெரிவித்தனர்.</p><p><br></p>