ஆசிய விளையாட்டு 2026 | தமிழ்நாட்டு நட்சத்திரங்கள் வறுமையிலிருந்து... ஆசிய மேடை வரை! - - சி.ஸ்ரீராமுலு

<p><strong>ஆசிய விளையாட்டு 2026 | தமிழ்நாட்டு நட்சத்திரங்கள் வறுமையிலிருந்து... ஆசிய மேடை வரை! கடன், காயம், வசதியின்மை எல்லாவற்றையும் தாண்டி ஐச்சி–நகோயாவில் பதக்கம் வென்ற தமிழ்நாட்டின் ஏழு வீரர், வீராங்கனைகளின் கதை - சி.ஸ்ரீராமுலு</strong></p><p><br></p><p><strong>பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனா அக்டோபர் 2 அன்று சென்னை நேரு உள்விளையாட்டு அரங்கில் நடைபெற்ற நிகழ்ச்சியில், ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில் பதக்கங்கள் வென்று தாயகம் திரும்பிய தமிழ்நாட்டைச் சேர்ந்த வீரர், வீராங்கனைகள் வித்யா ராம்ராஜ் (Athletics), பரணிகா இளங்கோவன் (Athletics), அபிநயா ராஜராஜன் (Athletics), விஷால் தென்னரசு கயல்விழி (Athletics), கமலினி (Cricket), ஹரிஹரன் (Badminton) ஆகியோரை நேரில் சந்தித்து பாராட்டுகளையும், வாழ்த்துகளையும் தெரிவித்தார். உடன் இளைஞர் நலன் மற்றும் விளையாட்டு மேம்பாட்டுத்துறை அரசு செயலாளர் சந்தீப் நந்தூரி இ.ஆ.ப., விளையாட்டு மேம்பாட்டு ஆணைய உறுப்பினர் செயலர் ஜெ.மேகநாத ரெட்டி, இ.ஆ.ப., இணை முதன்மை செயல் அலுவலர் மயில்வாகனன், இ.கா.ப., மாவட்ட வருவாய் அலுவலர் / பொது மேலாளர் (நிர்வாகம்) மருத்துவர் ரெ.சுமன் மற்றும் பொது மேலாளர் எல்.சுஜாதா ஆகியோர் உள்ளனர்.</strong></p><p><br></p><p>ஜப்பானின் ஆசிய விளையாட்டு அரங்கில் பதக்கப் பட்டியலில் பதிவானவை வெறும் எண்கள் அல்ல. தமிழ்நாட்டின் சிறு நகரங்களிலும் கிராமங்களிலும் பிறந்த கனவுகள், கடல் கடந்த மண்ணில் பதக்கங்களாக மாறிய கதைகள். மூன்று பதக்கங்களுடன் வித்யா ராம்ராஜ் முன்னால் நிற்க, அவரைச் சுற்றி இன்னும் பலர். களம் வேறு. கதை வேறு. ஆனால் தொடக்கப் புள்ளி ஒன்றுதான்.</p><p><br></p><p><strong>மதுரையின் இளம் புயல் கமலினி</strong></p><p>இந்த விளையாட்டில் இந்தியாவின் முதல் தங்கம் மகளிர் கிரிக்கெட்டில் வந்தது. செப்டம்பர் 22 அன்று நிஷின் நகரில் நடந்த இறுதிப் போட்டியில் இந்தியா 216/3 ரன்கள் குவித்தது. ஆசிய விளையாட்டு மகளிர் கிரிக்கெட்டின் அதிகபட்ச ஸ்கோர் இது. இலங்கை 69 ரன்களில் சுருண்டது. 147 ரன் வித்தியாசத்தில் வெற்றி. அந்தத் தங்க அணியில் இடம்பெற்றவர் மதுரையின் 18 வயது கமலினி.</p><p>சிறுவயதில் ஸ்கேட்டிங்கில் மாநில சாம்பியன். 12 வயதில் கிரிக்கெட் மீது பிறந்த ஆர்வத்தைக் கண்டு தந்தை குணாளன் மைதானத்துக்கு அழைத்துச் சென்றார். பந்துவீச்சில் தொடங்கிய பயணம், விக்கெட் கீப்பர்–பேட்டராக வடிவம் பெற்றது. 19 வயதுக்குட்பட்டோர் டி20 உலகக்கோப்பை வென்ற அணியிலும் இருந்தவர். இப்போது கழுத்தில் ஆசியத் தங்கம்.</p><p><br></p><p><strong>45 வினாடிச் சுவரைத் தகர்த்த ‘ஸ்டிக் மேன்’</strong></p><p>ஜோலார்பேட்டையின் 22 வயது விஷால் டி.கே. இரண்டு பதக்கங்களுடன் திரும்பினார். கலப்பு 4x400 மீட்டர் தொடர் ஓட்டத்தில் வித்யாவுடன் வெள்ளி (3:14.46). ஆடவர் 4x400 மீட்டரில் வெண்கலம் (3:01.61). கடைசி கோல் மாற்றத்தில் இந்தியா நான்காம் இடத்துக்குச் சரிந்தபோது, இறுதிச் சுற்றில் ஓடிய விஷால் தாய்லாந்தை முந்தி வெண்கலத்தை மீட்டார். ஜப்பான் (3:00.75) தங்கம், கத்தார் (3:00.93) வெள்ளி. தனிநபர் 400 மீட்டரில் 45.48 வினாடியுடன் ஐந்தாம் இடம்.</p><p>இந்த இளைஞரின் பெயரை வரலாற்றில் பதித்த எண் 44.98 வினாடி. 2026 மே 23 அன்று ராஞ்சி ஃபெடரேஷன் கோப்பையில் 400 மீட்டரை 45 வினாடிக்குள் ஓடிய முதல் இந்தியர் ஆனார். 1.89 மீட்டர் உயரம், மெலிந்த உடல்வாகு. அதனால் ‘ஸ்டிக் மேன்’. ஜமைக்கா பயிற்சியாளர் ஜேசன் டாவ்சனின் வழிகாட்டுதல். ஒவ்வொரு அடிக்கும் பின்னால் தந்தை தென்னரசு, தாய் கயல்விழியின் நம்பிக்கை.</p><p><br></p><p><strong>ஷூ இல்லாத பாதையிலிருந்து…</strong></p><p>முறையான ஷூ வாங்கவும் சத்தான உணவுக்கும் வசதி இல்லாத நாட்களில் ஓடத் தொடங்கியவர் திருவாரூர் மாவட்டம் பேரளத்தைச் சேர்ந்த ராஜேஷ். பெற்றோர் தங்கள் தேவைகளைக் குறைத்துக்கொண்டு மகனின் பயிற்சிக்குத் துணை நின்றனர். 2023 உலக சாம்பியன்ஷிப்பில் 2:59.05 என்ற ஆசிய சாதனையுடன் இந்திய அணியை இறுதிக்கு அழைத்துச் சென்ற நால்வரில் ஒருவர். ஹாங்சோவில் தங்கம் வென்றவர்.</p><p>ரயில்வேயில் பணியாற்றும் 27 வயது ராஜேஷ், நகோயாவில் ஆடவர் 4x400 மீட்டர் தகுதிச் சுற்றில் ஓடினார். அந்தச் சுற்றில் இந்தியா பதிவு செய்த 3:01.49 தான் அனைத்து அணிகளிலும் வேகமான நேரம். இறுதியில் அவர் இடத்தில் விஷால் ஓடினார். அணி வென்ற வெண்கலத்தில் ராஜேஷின் வியர்வையும் இருக்கிறது.</p><p><br></p><p><strong>டென்னிஸ் தவறவிட்ட பாதை…</strong></p><p>சென்னையில் பிறந்த அபய் சிங்கின் குடும்பம் உத்தரப் பிரதேசத்திலிருந்து பிழைப்புத் தேடி வந்தது. எட்டு வயதில் டென்னிஸ் கற்க நினைத்தார். கைகூடவில்லை. வீட்டுக்கு அருகிலிருந்த ஸ்குவாஷ் அகாடெமி புதிய பாதையைத் திறந்தது. ஹாங்சோவில் அணிப் பிரிவில் தங்கம், கலப்பு இரட்டையரில் வெண்கலம்.</p><p>இம்முறை ஆடவர் ஒற்றையர் பிரிவில் ஒரு கேமைக்கூட இழக்காமல் இறுதிக்கு முன்னேறினார். அரையிறுதியில் பாகிஸ்தானின் முகமது அஷாப் இர்ஃபானை 3–0 என வீழ்த்தினார். செப்டம்பர் 27 இறுதியில் மலேசியாவின் ங் ஈன் யோவிடம் 9–11, 5–11, 5–11 என்ற கணக்கில் தோல்வி. வெள்ளி. ஆசிய விளையாட்டில் அவரது மூன்றாவது பதக்கம். சொற்ப வருமானத்தை மகனின் கனவுக்காகச் செலவிட்ட தந்தைக்கு, அந்த மேடையே பதில்.</p><p><br></p><p><strong>கடன் ராக்கெட்டில் பறந்த ஹரிஹரன்</strong></p><p>மன்னார்குடியிலிருந்து புறப்பட்ட ஒரு ராக்கெட், ஆசிய அரங்கில் பதக்கத்தைத் தொட்டிருக்கிறது. லக்சயா சென், எச்.எஸ். பிரணாய், சாத்விக்–சிராக் ஆகியோருடன் ஆடவர் அணிப் பிரிவில் வெண்கலம் வென்ற இந்திய பேட்மிண்டன் அணியில் இடம்பெற்றவர் ஹரிஹரன் அம்சகருணன்.</p><p>விமானப் பயணச்சீட்டு விற்று வாழ்ந்த தந்தைக்கு மகனின் பயிற்சிச் செலவும் போட்டிச் செலவும் பெரும் சுமை. கடன் வாங்கினார். கனவை நிறுத்தவில்லை. சகோதரி விளையாடுவதைப் பார்த்துப் பிறந்த ஆர்வம், அவரை கோபிசந்த் அகாடெமி வரை அழைத்துச் சென்றது. அந்த வெண்கலத்தில் ஒரு குடும்பத்தின் கடன் சுமையும், அதைக் கடந்து சென்ற மகனின் பதிலும் இருக்கிறது.</p><p><br></p><p><strong>ஸ்ட்ரெச்சரில் வெளியேறியவர்…</strong></p><p>தென்காசி மாவட்டம் கல்லூத்து கிராமத்தின் 19 வயது அபிநயா ராஜராஜனின் ஓட்டம், கணித வகுப்பைத் தவிர்க்கத் தொடங்கிய ஒரு தற்செயலில் பிறந்தது. குவாரி உபகரணங்கள் விற்ற தந்தை ராஜராஜன், மகளின் பயிற்சிக்காகக் குடும்பத்தோடு திருநெல்வேலிக்குக் குடிபெயர்ந்தார். 2025 ஆசிய சாம்பியன்ஷிப்பில் 4x100 மீட்டர் தொடர் ஓட்டத்தில் வெள்ளி.</p><p>2026 பிப்ரவரியில் முழங்கால் தசைநார் காயம். ஸ்ட்ரெச்சரில் மைதானத்தை விட்டு வெளியேறினார். ஆறே மாதங்களில் திரும்பி, செப்டம்பரில் 100 மீட்டரில் 11.31 வினாடி என்ற சொந்தச் சிறந்த நேரத்தைப் பதிவு செய்தார். நகோயாவில் கலப்பு 4x100 மீட்டர் தகுதிச் சுற்றில் ஓடி (41.54 வினாடி) அணியை இறுதிக்கு அழைத்துச் சென்றார். இறுதியில் இந்தியா 41.06 வினாடி என்ற புதிய தேசிய சாதனையுடன் வெண்கலம் வென்றது. மகளிர் 4x100 மீட்டரில் அணி நான்காம் இடம். கிராமத்துப் பெண் எவ்வளவு தூரம் போவாள் என்று கேட்டவர்களே இன்று பெருமைப்படுகிறார்கள் என்கிறார் அபிநயா.</p><p>கம்பு ஊன்றி வரலாறு தாண்டிய பரணிகா</p><p>இந்தப் பட்டியலில் சேர வேண்டிய இன்னொரு பெயர் பரணிகா இளங்கோவன். செப்டம்பர் 25 அன்று மகளிர் கம்பு ஊன்றித் தாண்டுதலில் 4.15 மீட்டர் உயரம் தாண்டி, கஜகஸ்தானின் போலினா இவனோவாவுடன் வெண்கலத்தைப் பகிர்ந்தார். ஆசிய விளையாட்டு வரலாற்றில் கம்பு ஊன்றித் தாண்டுதலில் இந்தியாவுக்குக் கிடைத்த முதல் பதக்கம் இது.</p><p><br></p><p><strong>பல களங்கள்… ஒரே கதை</strong></p><p>இவர்களின் களங்கள் வேறு. பயணங்கள் வேறு. ஆனால் தொடக்கம் ஒன்றுதான். வசதிகள் குறைந்த வீடுகளில் பிறந்த கனவுகள். லாரி ஓட்டிய தந்தை, சம்பளத்தைக் கொடுத்த சகோதரி, கடன் வாங்கிய அப்பா, ஊரையே மாற்றிக்கொண்ட குடும்பம். இவர்கள் பெற்றது வெறும் பதக்கங்கள் அல்ல. சிறிய நகரங்களிலும் கிராமங்களிலும் பிறக்கும் கனவுகளுக்கும் பெரிய மேடை உண்டு என்பதற்கான சான்று. கதை இங்கே முடியவில்லை. தமிழ் மண்ணின் வெற்றி முழக்கம் தொடர்கிறது.</p>