சிட்டுக்குருவி!

<p><strong>சிட்டுக்குருவி!</strong></p><p>சிட்டுக்குருவி சிட்டுக்குருவி சேதி கேளாயோ- உன் பட்டுச் சிறகை விரித்தேதான் பறந்து வாராயோ!</p><p>விட்டம் தன்னில் அழகாக கூடு கட்டினாய் - நீ இஷ்டம் போல சுற்றி வந்து ஏனோ கத்தினாய்!</p><p>அரிசிப் பருக்கை கையில் வைப்பேன் உண்ண வாராயோ - என் அருகமர்ந்து நீவளர்ந்த கதைகள் சொல்லாயோ!</p><p>சின்னக் கண்ணும் சிவந்த மூக்கும் பார்க்கப் பிடிக்குமே - உன் சிணுங்கல் சத்தம் கேட்டால் எனக்கு சிரிப்பு வெடிக்குமே!</p><p>பள்ளம் தன்னில் தேங்கும் நீரில் மூழ்கிக் குளித்திடு- அதில் துள்ளி எழுந்துநீர்த்துளியை என்மேல் தெளித்திடு!</p><p> முற்றம் தன்னில் ஓடிப் பிடித்து விளையாட வாராயோ - யாரும் தொட்டுவிட அருகில் வந்தால் பறந்து போவாயோ!</p><p>தூணில் ஏறி எட்டிப் பார்த்தால் ஒளிந்து கொள்ளுவாய் - உன் துணையைக் கூட்டித் தோட்டமெங்கும் நடனம் ஆடுவாய்!</p><p><strong> -அருப்புக்கோட்டை செல்வம்</strong></p>