கானகம் ஒன்றில் பறவைகள் இணைந்து 
       போட்டி நடத்த இயற்றின தீர்மானம்
வானகம் பறக்கும் பச்சைக் கிளியோ
        நடமாடி வெல்லத் துடிக்கும் வெகுமானம்

வழக்கம் போலவே பேச்சுப் போட்டியில்
        பங்கு பெற்றிடும் பச்சைக் கிளியென 
இருக்கும் பறவைகள் நினைத்த வேளையில்
        நடனப் பயிற்சி கேட்டது மயிலை 

மறுத்த மயிலின்  தாயோ கிளியை
       திருப்பி அனுப்ப துயரம் அடைந்து 
வெறுத்த நிலையில் நண்பன் காகம் 
      யோசனை ஒன்றைச் சொன்னது நன்றே 

மயிலாடும் பகுதிக்குக் குடியது பெயர்ந்து  
       உயர்ந்த இடத்தில் கிளியின் குடும்பம் 
மயிலைக் காணும் வகையில் வாழ்ந்தது 
        தினமும் ஆடும் மயிலைக் கண்டது

சிலையாய் துரோணரை வைத்துப் பயின்ற
        ஏகலைவன் போலே மயிலைக் கண்டு
கலையாய் நடனம் கற்றது கிளியே
        போட்டியில் நுழைந்தது நம்பிக்கை கொண்டே

முதலில் நடனம் ஆடிய மயிலோ
          தன்னை வெல்ல ஆளேது என்றே
திமிரில் திரிந்த வேளையில் வந்தது
           தனித்திறன் காட்டிய பச்சைக் கிளியே

அரங்கில் சுழன்று ஆடிய விதமோ
          அனைவரைக் கவர பச்சைக் கிளியே
சிரசென பரிசை வென்றது நன்றே
           மயிலின் திமிரும் அடங்கியது அன்றே