ஐபிஎல் ஏலத்திற்கு மொத்தம் 1574 வீரர்கள் தங்களது பெயர்களை பதிவு செய்துள்ளனர்
சவுதி அரேபியாவின் ஜெட்டாவில் நவம்பர் 24, 25 ஆகிய தேதிகளில் ஐபிஎல் மெகா ஏலம் நடைபெறுகிறது. நவம்பர் 4ஆம் தேதியுடன் வீரர்கள் பதிவு முடிவடைந்த நிலையில், 1,574 வீரர்கள் தங்கள் பெயர்களை ஏலத்திற்காக பதிவு செய்துள்ளதாக விவரங்கள் தெரிவிக்கின்றனர்.
குறிப்பாக, 1,574 வீரர்களில் 1,165 இந்திய வீரர்களும், 409 அயல்நாட்டு வீரர்களும் அடங்குவர். 320 வீரர்கள் சர்வதேச போட்டிகளில் விளையாடிய கேப்டு(capped) வீரர்களும், 1,224 பேர் உள்ளூர் போட்டிகளில் மட்டுமே விளையாடிய அன்கேப்டு (un capped) வீரர்களும், அசோசியேட் நாடுகளிலிருந்து 30 வீரர்கள் பதிவு செய்துள்ளதாகவும் பிசிசிஐ தெரிவித்துள்ளது.
ஏலத்திற்காக பதிவு செய்துள்ள 409 அயல்நாட்டு வீரர்களில் 91 வீரர்கள் தென் ஆப்பிரிக்கா சேர்ந்தவர்களாவர். அதேபோன்று, ஆஸ்திரேலியாவிலிருந்து 76 வீரர்களும், இங்கிலாந்திலிருந்து 52 வீரர்களும் ஏலத்தில் பங்கேற்க உள்ளனர். இந்த மெகா ஏலத்தில் 204 வீரர்களை எடுக்க 10 அணி உரிமையாளர்களும் சேர்ந்து ரூ.641.5 கோடி வரை செலவு செய்யலாம் என கூறப்பட்டுள்ளது.