அகமதபாத்:
திருமணத்தன்று மாப்பிள்ளை அழைப்பு நிகழ்ச்சியின்போது, குதிரையில் பவனி வந்த தலித் மணமகனை, சாதி வெறியர்கள் கீழே இறக்கி விட்டு அவமானப்படுத்திய சம்பவம் அதிர்ச்சியை ஏற்படுத்தியுள்ளது.

குஜராத் மாநிலம் காந்தி நகரில் உள்ள பர்சா கிராமத்தைச் சேர்ந்தவர் பிரசாந்த் சோலங்கி (27). இவர் அங்குள்ள பால் பொருட்கள் தயாரிப்பு நிறுவனத்தில் வேலை பார்த்து வருகிறார். இவருக்கும் வர்ஷா என்பவருக்கும் திருமணம் நிச்சயக்கப்பட்டது. சுமார் 2 லட்சம் ரூபாய் செலவில் இவர்களின் திருமணத்திற்கான ஏற்பாடுகள் செய்யப்பட்டிருந்தன.

இந்நிலையில், திருமணத்தன்று மாப்பிள்ளை அழைப்பாக பிரசாந்த் தனது வீட்டிலிருந்து மணப்பெண் வீட்டுக்கு காரில் சென்றார். பின்னர், அங்கிருந்து திருமணம் நடக்கும் இடத்துக்கு செல்ல அவர்களது உறவினர்கள் அலங்கரிக்கப்பட்ட குதிரை ஒன்றை ஏற்பாடு செய்து, மணமகன் பிரசாந்தை அதில் ஏற்றியுள்ளனர். அவரும் மகிழ்ச்சியுடன் குதிரையில் பவனி வந்துள்ளார்.

அப்போது வழியில், சாதி ஆதிக்கப் பிரிவைச் சேர்ந்த ஒரு கும்பல், தலித் பிரிவைச் சேர்ந்த பிரசாந்த் எப்படி குதிரையில் வரலாம் என்று கேட்டுத் தகராறு செய்து, பிரசாந்த்தை குதிரையில் இருந்து இறக்கி விட்டு அவமானப்படுத்தியுள்ளனர். மணமேடைக்கு மிகுந்த மகிழ்ச்சியுடன் சென்றுகொண்டிருந்த பிரசாந்த், சாதி வெறியர்களின் இந்த அராஜகத்தால் மிகவும் மனமுடைந்து போனார். பின்னர் ஒருவழியாக திருமணம் நடந்து முடிந்துள்ளது.
இந்நிலையில், தலித் மணமகனை குதிரையிலிருந்து இறக்கி விட்ட சம்பவத்திற்கு கடும் கண்டனங்கள் எழுந்துள்ளன.

Leave A Reply

%d bloggers like this: