கோவை, பிப். 4-
கோவை- பெங்களூர் இடையே இயக்கப்பட உள்ள உதய் எக்ஸ்பிரஸ் ரயிலுக்கு எல்சிடி டிவி, காபி மேக்கர் இயந்திரத்துடன் இரட்டை அடுக்குமாடி பெட்டிகள் தயாரிக்கும் பணிகள் தீவிரப்படுத்தப்பட்டுள்ளதாக ரயில்வே அதிகாரிகள் தெரிவித்துள்ளனர்.

கோவை- பெங்களூர் இடையேயான உதய் எக்ஸ்பிரஸ் ரயில் கடந்த 2016ஆம் ஆண்டு அறிவிக்கப்பட்டது. ஆனால் இத்திட்டம் தொடர்ந்து இழுபறியில் நீடித்து வருகிறது. இதனிடையே கடந்த ஆண்டு ஏப்ரல் மாதத்தில் உதய் எக்ஸ்பிரஸ், இயக்கும் பொருட்டு முதற்கட்டமாக இரட்டை அடுக்குமாடி பெட்டிகள் சோதனை ஓட்டத்திற்கு கொண்டு வரப்பட்டது. இந்த சோதனை வெற்றியடைந்ததை தொடர்ந்து கோவை பெங்களூர் இடையே இயக்கப்படும் உதய் எக்ஸ்பிரஸ் ரயிலுக்கு இரட்டை அடுக்குமாடி கொண்ட பெட்டிகள் பொருத்த ஏற்பாடுகள் செய்யப்பட்டது. இதற்காக பிரத்தியேகமாக பெட்டிகள் கபூர்தாலவில் தயாரிக்கப்பட்டு வந்தது. ஆனால் அங்கு காலதாமதம் நிலவயதால் சென்னை ஐ.சி.எப்.பில் தற்போது பெட்டிகள் தயாரிக்கும் பணிகள் நடந்து வருகிறது.

இது குறித்து ரயில்வே அதிகாரிகள் கூறுகையில், புதிதாக தயாரிக்கப்பட்டு வரும் இரட்டை அடுக்கு ரயில் பெட்டியில் சாய்வு வசதியுடன் கூடிய 114 இருக்கைகள் இருக்கும். முற்றிலும் குளிர்சாதன வசதியுடன் தயாரிக்கப்பட்டு வரும் இந்த ரயிலின் அனைத்து பெட்டிகளிலும் பெரிய எல்சிடி டிவி பொருத்தப்பட்டிருக்கும். காபி மேக்கர், ஒலிப்பெருக்கி, என்பது உள்ளிட்ட பல்வேறு சிறப்பு அம்மசங்களுடன் இப்பெட்டிகள் தயாரிக்கப்பட்டு வருகிறது. 90 சதவீத பணிகள் முடிந்துள்ளது. அடுத்த மாதத்திற்குள் இந்த ரயில் பொதுமக்கள் பயன்பாட்டிற்கு இயக்கப்படும். இந்த ரயில் கோவையில் இருந்து காலை 5.45 புறப்பட்டு, திருப்பூர், ஈரோடு, சேலம் வழியாக மதியம் 12.40க்கு பெங்களூர் சென்றடையும். இதே போல் பெங்களூரில் இருந்து மதியம் 12.15க்கு புறப்பட்டு இரவு 9 மணிக்கு கோவை வந்தடையும் என அதிகாரிகள் கூறினர்.

Leave A Reply

%d bloggers like this: