குன்ணூர்,
குன்னூா் அருகே மூன்றாவது மாடியில் இருந்து காருடன் கீழே விழுந்த கல்லூரி மாணவி உயிரிழந்த சம்பவம் பெரும் சோகத்தை ஏற்படுத்தி உள்ளது.
நீலகிரி மாவட்டம் குன்னூர் ரெய்லி காம்பவுண்ட் பகுதியை சேர்ந்தவர் முருகேசன். இவர் குன்னூர் அரசு மருத்துவமனை அருகே கம்ப்யூட்டர் மையம் நடத்தி வருகிறார். இவருடைய மகள் யமுனா. இவர் குன்னூரில் உள்ள மகளிர் கல்லூரியில் முதலாமாண்டு படித்து வந்தார். யமுனா சில நாட்களாக தனது தந்தையின் காரை ஓட்டி பழகி வந்தார். இந்த நிலையில் யமுனா நேற்று தனது வீட்டின் 3–வது மாடியில் உள்ள ‘பார்க்கிங்’ பகுதியில் நிறுத்தி இருந்த காரை எடுத்தார். அப்போது கார் பின்நோக்கி நகர்ந்தது.

கார் கட்டுப்பாட்டை இழந்து 3–வது மாடியில் இருந்த தடுப்பு கம்பியை உடைத்து கொண்டு கீழே விழுந்தது. கார் தலைகுப்புற சாலையில் கிடந்தது. இதில் காரின் இடிபாட்டுக்குள் யமுனா சிக்கி கொண்டார்.

மாடியில் இருந்து கார் விழுந்த சத்தம் கேட்டு வீட்டுக்குள் இருந்த யமுனாவின் பெற்றோர் மற்றும் அக்கம் பக்கத்தில் இருந்தவர்கள் ஓடிவந்து யமுனாவை மீட்க முயன்றனர்.

காரின் பின் பக்க கண்ணாடியை உடைத்து பலத்த காயங்களுடன் உள்ளே இருந்த யமுனாவை மீட்டனர். பின்னர் அவரை சிகிச்சைக்காக குன்னூர் அரசு மருத்துவமனைக்கு கொண்டு சென்றனர். ஆனால் மருத்துவமனைக்கு செல்லும் வழியிலேயே யமுனா பரிதாபமாக உயிரிழந்தார். இந்த விபத்து குறித்து வழக்கு பதிவு செய்து குன்னூர் நகர காவல்துறையினர் விசாரணை மேற்கொண்டு வருகின்றனர்.

Leave A Reply